Deputeti i Lëvizjes Vetëvendosje, Vigan Qorrolli, ka bërë të ditur se takimet e drejtpërdrejta për zgjedhjen e presidentit do të fillojnë nga java e ardhshme.
Ai tha se deri tani kontaktet kanë qenë të vazhdueshme dhe atmosfera mbetet pozitive, pavarësisht disa sfidave që duken në publik.
“Takimet e drejtpërdrejta për çështjen e presidentit do të nisen të realizohen nga fillimi i javës së ardhshme. Deri në këtë moment kontaktet nuk kanë munguar. Atmosfera është pozitive, pavarësisht disa sfidave që mund të duken në publik që ka vështirësi për ta zgjidhur këtë ngërç. Por, VV-ja është e interesuar jetikisht që ta zgjedhim presidentin,ndërkohë që plani ynë B janë zgjedhjet”, tha ai në emisioni “Info Nata” në Tëvë1.
Ndërkohë tha se në këtë moment nuk ka konsensus për zgjedhjen e presidentit të ri, derisa tha se LVV-ja është e gatshme edhe për kompromise.
“Deri në këtë moment nuk ka konsensus, por ju e dini ne si pozicion politik, si VV, si mazhorancë po synojmë që ta zgjedhim presidentin dhe të mos shkojmë në zgjedhje, sepse për disa faktorë nuk është momenti i duhur për të shkuar në zgjedhje. Ndërkohë që PDK-ja po e thotë të kundërtën, pasi që është e interesuar për zgjedhje të reja jo për zgjidhje. Jemi të gatshëm për kompromise”, deklaroi Qorrolli.
Ndërkohë që Kuvendi ka afat deri më 28 prill për të zgjedhur presidentin e ri, pas vendimit të Gjykatës Kushtetuese. Nesër detyrën e presidentes e merr kryeparlamentarja Albulena Haxhiu. Procedura 60-ditëshe për zgjedhjen e presidentit ka nisur më 5 mars, kur Kuvendi nuk hodhi në votim kandidaturat e Glauk Konjufcës dhe Fatmire Mulhaxhës për shkak të mungesës së kuorumit. /teve1.info/
