Ishin rrugës duke kryer detyrat e tyre të zgjedhjeve.
Mirëpo, puna nuk u shkoi ashtu siç duhet.
Mbrëmjen e së premtes, pesë zyrtarë zgjedhor pësuan lëndime të rënda pasi u përfshin në një aksident rrugor në fshatin Slivovë të Ferizajt.
Sipas Policisë së Kosovës, vetura e tyre u përplas me një autobus.
Pas lëndimeve serioze që morën, katër prej tyre u dërguan për trajtim mjekësor në Qendrën Klinike Universitare të Kosovës.
“Dy pacienta nga kjo fatkeqësi në trafik janë dërguar në Kirurgji Torakale, një pacient është dërguar në mjekim intensiv qendror ndërsa pacienti i katërt është reanimacion në një gjendje të rënduar, ka lëndime në kokë, ka lëndime në krahëror, frakturë të brinjëve ka ajër dhe gjak në mushkëri. I është bërë drenazha e toraksit, gjithashtu ka edhe tokosione në regjionin e abdomenit. Pacienti në fjalë duhet të dërgohet në mjekim intensiv mirëpo momentalisht nuk kemi vend të lirë dhe pritet që në çdo kohë të dërgohet momentalisht është në terapi nga mjekët reanimatorë”, tha doktori Avdush Bajgora.
Rastin e kanë konfirmuar edhe nga Komisioni Qendror i Zgjedhjeve.
“Pesë zyrtarët e përfshirë në këtë ngjarje ishin të angazhuar me përkushtim të lartë në përmbylljen e procesit zgjedhor në komunën e Ferizajt, i cili u mbajt më 12 tetor në të gjithë vendin. Në këto moment të vështira, Komisioni Qendror i zgjedhjeve shpreh shqetësimin e thellë për këtë ngjarje dhe lutet për shërimin sa më të shpejtë të tyre. Mendimet dhe përkrahja jonë janë me anëtarët e KKZ-së në Ferizaj dhe me familjet e tyre”, thuhet nga KQZ-ja.
Nga Policia bënë të ditur se për këtë aksident është njoftuar edhe prokurori kujdestar.
Kronikë e realizuar nga gazetarja Jona Kelmendi.
