Me flamuj në duar e me veshje ushtarake po i prijnë rreshtimit për tek varret e Jasharëve në Prekaz.
Qindra nxënës nga anë e kënd Kosovës erdhën për të bërë homazhe në këtë Kompleks Memorial.
Ata vizituan edhe kullën e dëshmorëve të rënë për lirinë e Kosovës.
E vullneti për të ditur më shumë për ta po rritet dita ditës.
“Historinë e dimë shumë mirë, mirëpo dita ditës personalisht mundohem të informohem më shumë, sidomos për rolin e Adem Jasharit i cili jo vetëm që ishte roli i tij të cilin sot e njohim por kishte edhe rol të madh politik në atë kohë”, tha nxënësi, Blear Meha.
E për të kujtuar ngjarjen që ndryshoi historinë e Kosovës, vizitat në këtë vend i ndjen të obligueshme mësuesi Sabit Gashi.
“Ne jemi të obliguar të vijmë çdoherë këtu edhe të falemi çdoherë para këtyre varrezave dhe para kësaj kulle heroike e cila e ndryshoi historinë kombëtare”, tha Gashi.
Nderime për sakrificën e familjes Jashari gjatë të martës bënë edhe mërgimtarët.
Ditën e dytë të Epopesë së UÇK-së Kompleksin Memorial e vizituan krerët e shtetit dhe opozita.
Kronika e gazetares Albiona Hajdari.
