Rrjeti i organizatave “QIKA”, kanë reaguar për vendimin e Gjykatës Supreme për lirimin e Naser Pajazitajt, i cili ka qenë i akuzuar për vrasjen e Donjeta Pajazitajt më 2015.
Për këtë vendim “QIKA”, ka thënë se kanë krijuar shqetësim e paqartësi të mëdha në opinionin publik.
Në njoftimin e tyre thuhet se rasti është trajtuar në të gjitha shkallët gjyqësore në Kosovë, si dhe janë marrë vendime diametralisht të kundërta në shkallë të ndryshme.
Për ndryshmet e vendimeve të drejtësisë, ato i kanë cilësuar laramani që ilustron dështimin e sistemit të drejtësisë në Kosovë.
Në komunikatën e tyre thuhet se Donjeta është një viktimë e femicidit dhe për të nuk ka ende drejtësi.
“Vrasësi i saj është në liri. Kërkojmë që institucionet e drejtësisë të japin llogari për dështimet në trajtimin e këtij rasti dhe kërkojmë drejtësi për Donjetën!”.
Në mars të vitit 2018 Gjykata Themelore në Pejë të akuzuarin Naser Pajazitaj e kishte liruar nga akuzat për vrasjen e Donjeta Pajazitajt, ndërsa pas kthimit në rigjykim, Gjykata Themelore në Pejë, në mars të vitit 2019, e kishte shpallur fajtor të akuzuarin dhe e kishte dënuar me burgim të përjetshëm.
Në qershor të vitit 2022 Gjykata Themelore në Ferizaj e kishte dënuar të akuzuarin Pajazitaj me burgim të përjetshëm, ndërsa Gjykata e Apelit e kishte ulur dënimin me burgim në kohëzgjatje prej 35 vitesh.
I akuzuar, Naser Pajazittaj, u lirua dje me vendim të Gjykatës Supreme, derisa lirimi i tij ka ngjallur reagime të shumta. /teve1.info/
