Kështu është shprehur zëdhënësi i Qeverisë, Përparim Kryeziu i cili tha se ky është një obligim kushtetues.
Sipas tij, pengimi apo pamundësimi i mbajtjes së zgjedhjeve është sulm ndaj demokracisë.
“Institucionet e Republikës së Kosovës kanë treguar gatishmërinë për të ofruar kushtet e nevojshme për mbarëvajtje të zgjedhjeve. Zgjedhjet janë manifestim i fuqishëm i demokracisë. Pengimi apo pamundësimi i tyre është sulm ndaj demokracisë. Pas dorëheqjeve të kryetarëve të katër komunave në veri të vendit, mbajtja e tyre tashmë është obligim kushtetues i institucioneve të Republikës”, shkroi ndër tjerash ai.
Tutje, Kryeziu shtoi se janë në pritje të vlerësimit të situatës nga organet e sigurisë për hapat e mëtejmë.
“Qytetarët tanë atje kanë nevojë për përfaqësim direkt të tyre. Institucionet kanë nevojë për drejtues legjitim të tyre. Bandat kriminale mund edhe mos të marrin pjesë në zgjedhje, por ato nuk mund ta diktojnë mbajtjen apo jo të zgjedhjeve demokratike. Aktet e dhunës dhe veprimet kriminale duhet të dënohen njëzëri. Presim vlerësimin e situatës në veri nga organet tona të sigurisë për hapat e mëtejmë”, shtoi ai.
