Qeveria e Kosovës ka vendosur ta shuaj Agjencinë për Investime dhe Përkrahje të Ndërmarrjeve në Kosovë, e cila funksion tash e mbi dy dekada.
Shuarja e kësaj agjencie është paraparë të bëhet në momentin e hyrjes në fuqi të Ligjit për Investime të Qëndrueshme, drafti i të cilit tashmë është në procedurë të shqyrtimit në Kuvendin e Kosovës.
Në vend të KIESA-s, do të themelohen dy agjenci të tjera: Agjencia e Investimeve dhe Eksporteve dhe Agjencia për Përkrahjen e Ndërmarrjeve. E para parashihet t’i përgjigjet Zyrës së Kryeministrit, ndërsa e dyta- Ministrisë së Industrisë dhe Tregtisë.
Por, sipas deputetit të PDK-së, Ferat Shala, shuarjen e kësaj agjencie, Qeveria e Kosovës e bën për të mbuluar skandalet lidhur me investimet strategjike.
“Me shuarjen e KIESA-s, po tentohet të mbulohet manipulimi i dhjetë milionë eurove kredi nga Banka Botërore, që kanë qenë të destinuara për zhvillimin e kësaj agjencie. Pra kjo qeveri ka marrë kredi për zhvillimin e KIESA-s, por mjetet kanë shkuar në linja krejt tjera buxhetore dhe tash për të mbuluar këtë skandal financiar duhet të shuhet agjencioni. Në esencë, shuarja po bëhet edhe për një arsye tjetër sepse skandalet që janë me investime strategjike të kësaj qeverie nuk mund të mbulohen ndryshe veçse me shuarjen e agjencioneve”, ka thwnw ai.
Mirëpo çfarë do të ndodhë me stafin ekzistues në këtë institucion?
Tëvë1 ka kërkuar përgjigje para afro dy javësh nga Ministria e Tregtisë dhe Industrisë lidhur me këtë çështje, mirëpo nga kjo ministri nuk i janë përgjigjur interesimit të televizionit.
Ndërkohë, ekonomisti Safet Gërxhaliu beson se do të ketë vetëm bartje të punëtorëve.
“Nuk besoj që do të ketë mbyllje, do të ketë bartje….Sepse Kosova nuk e ka komoditetin të humb kuadro çfarë kanë qenë aty…”, ka thënë ai.
Në këtë agjenci aktualisht janë të punësuar 23 zyrtarë publikë.
Kronika e realizuar nga gazetarja Albiona Hajdari
