Kryeziu thotë se formimi i Asociacionit me karakter etnik bie ndesh me Kushtetutën e Kosovës.
“Qëndrimi jonë për Asociacionin e Komunave me Shumicë Serbe është i njohur, i qartë dhe i njëjtë. Asociacione që karakter themeltar kanë etninë bien ndesh me Kushtetutën e Republikës sonë dhe vet karakterit e shtetit tonë. Për më tepër, komunitetet jo-shumicë kenë nevojë për integrim, jo izolim”, tha ai.
Ndërsa në lidhje me dokumentin që ka qarkulluar sot në media se si do të duket Asociacioni, Kryeziu thotë se i njëjti është veç draft dhe pa autor.
“Sa i përket dokumentit që ka qarkulluar sot në media, ai përveçse draft, është pa autor. Në anën tjetër ne jemi Qeveri e Republikës së Kosovës që kemi kushtetutshmëri dhe ligje të cilat i mbrojmë dhe respektojmë”, tha ai.
Dje, emisari special i SHBA-së për Ballkanin Perëndimor, Gabriel Escobar ka deklaruar se Asociacioni “është një zotim që tashmë ekziston, mendoj se është një zotim i rëndësishëm dhe që duhet të përmbushet”.
Sipas tij, gjëja më e rëndësishme është që duhet të jetë në përputhje me Kushtetutën e Kosovës dhe t’u përmbahet ligjeve të Kosovës. /Teve1.info/
