Që nga viti 2015, është në fuqi ligji për mbikëqyrjen elektronike të personave, ndaj të cilëve me vendim të gjykatës janë vendosur masat për sigurimin e pranisë së të pandehurit, apo urdhrat mbrojtës ose të mbrojtjes emergjente, për mbrojtje nga dhuna në familje.
Për ta mundësuar këtë, nevojiten disa pajisje, të cilat institucionet nuk i kanë në posedim.
Por pas tetë vitesh nga miratimi, Qeveria ndau 600 mijë euro për këtë vit, për blerjen e byzylykëve, që do të krijonte hapësirë për zbatueshmërinë e këtij ligji.
Megjithatë, Liridon Salihi nga GLPS, vlerëson se jo gjithçka kompletohet me ndarjen e këtyre mjeteve.
Mbikëqyrja elektronike përcaktohet me vendim të gjykatës, me një afat të kohëzgjatjes jo me shumë se një vit.
Kjo realizohet nga Policia e Kosovës, e cila me ligj është përgjegjëse për vendosjen, heqjen dhe funksionimin e rregullt të pajisjes.
Tek ky institucion, raportimet për dhunim arrijnë në numra dy shifror.
“Statistikat për veprën penale nga neni 227, Dhunimi, për periudhën kohore 2022 janë raportuar 93 raste. Kurse për dy muajt e parë të vitit 2023, janë raportuar 16 raste të dhunimit”, thuhet nga Policia.
Në kuadër të Policisë për zbatimin e këtij ligji, do të krijohet edhe një sallë operative për përcjelljen e informacionit për vendndodhjen e personit, informacione të cilat do të ruhen për një kohë më të gjatë se 6 muaj.
Kronika e realizuar nga gazetarja Florijeta Dernjani