Kabineti i ri qeveritar, në mbledhjen e tij të parë pas zgjedhjes, ka miratuar Projektligjin për Ratifikimin e Marrëveshjes së Financimit për Programin e Parë për “Financimin e Politikave Zhvillimore për Efektivitetin Fiskal, Konkurrueshmërinë dhe Rritjen e Gjelbër” mes Kosovës dhe Asociacionit Ndërkombëtar për Zhvillim, pjesë e Bankës Botërore.
Ministri i Financave, Hekuran Murati, tha se marrëveshja prek vlerën e 90.3 milionë eurove, me një periudhë kthimi prej 12 vjetësh dhe normë interesi zero për qind:
“Periudha e kthimit është 12 vjet, norma e interesit zero për qind. Konsideruar rëndësinë e marrëveshjes dhe kushtet e mira financiare, ju ftoj ta miratojmë për ta proceduar në Kuvend për ratifikim.”
Gjithashtu, Qeveria ka miratuar edhe marrëveshjen e kredisë për Projektin KOMPAS – Qasja Gjithëpërfshirëse e Kosovës për Forcimin e Sistemit të Shëndetësisë, ndërmjet Ministrisë së Financave dhe Asociacionit Ndërkombëtar për Zhvillim. Vlera e kësaj kredie arrin 18.6 milionë euro, me një kohëzgjatje prej 30 vitesh.
Këto marrëveshje synojnë të mbështesin zhvillimin ekonomik, rritjen e konkurrueshmërisë dhe forcimin e sistemit shëndetësor në vend, duke siguruar financim me kushte të favorshme nga Banka Botërore.
