Sipas Kurtit, krimet e kryera dhe dëmet e shkaktuara duhet të adresuar sepse ato janë parakusht për paqe të qëndrueshme, stabilitet afatgjatë dhe zhvillim të mëtutjeshëm të shoqërisë.
Kryeministri i Kosovës, Albin Kurti e hapi mbledhjen e qeverisë me projektligjin për themelimin e Institutit për Krimet e kryera gjatë luftës në Kosovë.
Kurti tha se spektri i konfliktit të dhunshëm, luftës, dhunës e gjenocidit ende shtrohet nëpër Evropë duke e bërë sipas tij, iluzor zbatimin e të drejtave të njeriut, demokracinë dhe sundimin e ligjit.
“Funksionimi joadekuat i institucioneve përgjegjëse ose mungesa e tyre shpien te pamundësia e rindërtimit të paqes.
Historia na mëson që zgjidhjet afatgjate janë të paarritshme atëherë kur nuk bazohen në parimet e drejtësisë, reparacionit dhe të vërtetës dhe garantimit për mospërsëritje.
Është detyrë e qeverisë që mbi të vërtetën të ndërtoj mekanizma institucional për ballafaqimin me të kaluarës dhe krijimin e kujtesës kolektive e cila do të na shërbej jo vetëm neve por edhe gjeneratave të ardhshme.
Për këtë kam kënaqësinë që të filloj mbledhjen me Projektligjin për Institutin e krimeve të kryera gjatë Luftës në Kosovë”, tha Kurti.
Ky institutit sipas Kurtit, do të themelohet në kuadër të zyrës së kryeministrit dhe do të mbikëqyret nga ky institucion.
