Ai kishte planifikuar ta vizitonte të dielën Jasenovacin dhe Pakracin por që autoritetet kroate nuk e lejuan këtë, raporton agjencia kroate e lajmeve Index.
Sipas qeverisë kroate, presidenti serb po planifikonte që me vizitën e tij të krijonte një kaos, raporton Jutarnji list.
Vuçiq, sipas burimeve nga qeveria e Plenkoviqit kishte kontaktuar me kryetarin e partisë serbe, SDSS, Milorad Pupovac ku i kishte bërë të ditur se po planifikonte një vizitë private në një zonë përkujtimore në Jasenovac ku vdiqën shumë serbë në Luftën e Dytë Botërore.
Ai e kishte ftuar Pupovacin që t’i bashkohej dhe kishte thënë se, nëse e konsideronte të nevojshme, do ta informonte qeverinë kroate për vizitën e tij, gjë që e bëri Pupovac dhe qeveria kroate, siç shkruan Jutarnji, u trondit nga mënyra se si presidenti serb kishte planifikuar të krijonte kaos në Kroaci.
Pa njoftim zyrtar të autoriteteve kroate, pa koordinim me ambasadën, Vuçiq kishte dashur ta kalonte kufirin nga Bosnjë e Hercegovina, përkatësisht entiteti i saj Republika Srpska dhe të mbërrinte në Jasenovac rreth orës 11:00 dhe më pas në Pakrac rreth orës 14:00.
