Një draft-statut për Asociacionin e Komunave me Shumicë serbe i ngjashëm si ky i Fondacionit Friedrich Ebert Stiftung po përgaditet nga Qeveria e Kosovës.
Drafti që po hartohet do të dorëzohet në Gjykatën Kushtetuese në fund të majit.
Krejt këto informacione përmes një letre, Ministria e Punëve të Jashmte, Donika Gervalla ia ka dërguar presidentit të Asamblesë Parlamentare të Këshillit të Evropës, Theodoros Rousopoulos.
Më pas kryediplomatja thirri konferencë për media me ç’rast tha se shteti ka shpresë që kjo lëvizje do e afrojë Kosovën drejt Këshillit të Evropës.
“ Ky draft- dokument do të përmbushte detyrimet e trashëguara ndërkombëtare të Kosovës, do të plotësonte nevojat e qytetarëve të komunitetit në Kosovë, dhe njëhkosisht do të respektonte në tërësi dhe në detaje, Kushtetutën dhe të gjitha ligjet e Republikës së Kosovës, por njëhkosisht edhe parimet dhe vlerat e Këshillit të Evropës në të cilin kemi bërë kërkesë për anëtarësim”, tha Gërvalla.
E pyetur nëse Qeveria është koordinuar me presidenten e vendit Vjosa Osmanin për këtë hap, ajo tha ka pasur koordinim mes institucioneve.
“ Koordinimi mes institucioneve tona si rrallë ndonjëherë në një nivel të jashtëzakonshëm, dhe të jeni të sigurt se edhe presidentja sic e keni parë, ka qenë bashkënënshkruese e zotimeve dhe kjo letër e sotme nuk është asgjë e re”
Por ndryshe thonë nga Presidenca.
Në një përgjigje për Tëvë1, Bekim Kupina, këshilltar i presidentes, Vjosa Osmani, thuhet se letra e djeshme e Qeverisë e dërguar në Këshillin e Evropës, nuk është konsultuar e dakorduar me shefen e shtetit.
“Presidentja Osmani përkrahë vetëm qëndrime dhe veprime paraprakisht të konsultuara, të koordinuara dhe të dakorduara me institucionin e Presidencës si institucion kushtetues me kompetenca të qarta në fushën e politikës së jashtme dhe si gardian i funksionimit kushtetues të institucioneve. Kjo letër nuk është e tillë. Mund të jetë konsultuar e koordinuar me individë jashtë institucioneve që sot e kanë publikuar këtë letër, por jo me Presidencën”, ka thënë Kupina
Kërkesat për Themelimin e Asociacionit të komunave me shumicë serbe, kanë ardhur vazhdimisht nga blloku evropian por edhe Shtetet e Bashkuara të Amerikës, si kushtëzim edhe për anëtarësimin e Kosovës në Këshillin e Evropës.
Ky hap që ka marrë Kosova është vetëm një ditë para 17 majit, dita kur niveli ekzekutiv i Ministrave në Këshillin e Evropës do të mbajë mbledhjen, e që deri më tani Kosova nuk është pjesë e agjendës ditore
