Qeveria e Kosovës e ka emëruar drejtor në Drejtorinë e Përgjithshme të Akreditimit në MINT, Irfan Lipovicën, i cili ishte i arrestuar nën dyshimin për përfshirje në skandalin e rezervave shtetërore.
Vendimi u mor në mbledhjen e sotme pas rekomandimit nga ministrja Rozeta Hajdari.
“Akreditimi si proces me rëndësi të lartë për ekonominë vërteton cilësinë dhe besueshmërinë e institucioneve dhe bizneseve, pasi që përmes këtij procesi vlerësohet përputhshmëria e produkteve dhe të proceseve e shërbimeve me standarde ndërkombëtare e vendore duke garantuar kështu që të ofrojë nivel të lartë të cilësisë”, ka thënë ajo.
Lipovica ishte arrestuar bashkë me Ridvan Muharremin dhe një zyrtar tjetër në MINT, pas raportimit për dallavere me rezervat shtetërore.
Sipas Prokurorisë, Lipovica ka lejuar me dijeni të plotë që në kundërshtim me legjislacionin në fuqi të anashkalohet procedura e hapur e Prokurimit publik për blerjen e rezervave shtetërore./teve1.info/
