Profesori universitar, Gëzim Qerimi, ka vlerësuar se dorëheqja e Memli Krasniqit nga posti i kryetarit të Partisë Demokratike të Kosovës është një veprim që dëshmon vendosjen e interesit të shtetit në rend të parë, para interesit personal.
Në emisionin “Ditari” në Teve1, Qerimi ka thënë se Krasniqi nuk ka qenë një lider pa rezultate, pasi gjatë mandatit të tij katërvjeçar partia ka arritur të forcojë pozitat e saj në skenën politike të vendit.
“Fjalimi i Memlit ishte një fjalim mjaft i mirë, ndryshe nga modeli tradicional i liderëve ballkanikë dhe atyre në Kosovë e Shqipëri. Ishte një fjalim që interesin e shtetit e vendos para atij personal. Nëse e shikojmë në aspektin e rezultateve, ai ka arritur suksese në të gjitha garat elektorale. E mori partinë me rreth 148 mijë vota dhe sot PDK-ja ka mbi 200 mijë vota. Ai e sheh këtë si moment për një lidership të ri që do ta çojë partinë përpara”, ka deklaruar Qerimi.
Ai është shprehur i bindur se zhvillimet e fundit brenda PDK-së, përfshirë rastin e kryetarit të Drenasit, Ramiz Lladrovci, nuk kanë ndikuar në vendimin e Krasniqit për t’u tërhequr nga udhëheqja e partisë.
“Nuk besoj se rasti i Lladrovcit ka ndikuar në këtë vendim. Dega e PDK-së në Drenas gjithmonë ka pasur probleme që nga themelimi, para 25 vitesh. Aty kanë ekzistuar gjithmonë grupe të fuqishme brenda degës, dhe as në kohën e Hashim Thaçit, Jakup Krasniqit apo Kadri Veselit nuk është arritur menaxhim i plotë, sepse është ndër më të fuqishmet e partisë”, ka theksuar ai.
Qerimi vlerësoi gjithashtu se nevojë për ndryshim të lidershipit kanë edhe partitë e tjera politike në Kosovë, duke përmendur në veçanti Lëvizjen Vetëvendosje, LDK-në dhe AAK-në.
“Ndërrimi i lidershipit është i domosdoshëm për të gjitha partitë. Vetëvendosja ka liderin më jetëgjatë në skenën politike – mbi 20 vjet në krye të saj. Edhe në LDK, megjithëse kryetari aktual ka ardhur viteve të fundit, nëse ekzistojnë alternativa më të mira, duhet të merren parasysh. Edhe AAK-ja ka nevojë për ndryshim, megjithatë deri tani nuk ka shenja në këtë drejtim”, ka përfunduar Qerimi./teve1.info/
