Një person është qëlluar me armë zjarri, në orët e hershme të së dielës, në rrugën Klinë–Gjakovë, përkatësisht në afërsi të fshatit Kramovik.
Zëdhënësi i Policisë për rajonin e Gjakovës, Sheremet Elezaj, për tëvë1.info ka bërë të ditur se në momentin e ngjarjes viktima kishte qenë duke udhëtuar me familjarët e tij.
Elezaj gjithashtu ka njoftuar se viktima aktualisht është duke marrë trajtim mjekësor, ndërsa në konsultim me prokurorin e shtetit, rasti është iniciuar si “Vrasje në tentativë”.
“Sot në orët e hershme të mëngjesit, është pranuar informata se një mashkull i moshës madhore është dërguar për trajtim mjekësor, pasi ishte qëlluar me armë zjarri. Ngjarja dyshohet të ketë ndodhur rreth orës 01:00, në rrugën Klinë–Gjakovë në afërsi të fshatit Kramovik. Sipas të dhënave fillestare, viktima kishte qenë duke udhëtuar me familjarët e tij. Ne ndërkohë kishte dalë nga vetura me të cilën po udhëtonte dhe në afërsi të rrugës është qëlluar nga një drejtim ende i panjohur. Viktima aktualisht është duke marrë trajtim mjekësor. Lidhur me rastin është njoftuar prokurori i shtetit dhe në konsultim me të është iniciuar rast “Vrasje në tentativë”. Rasti është duke u hetuar nga njësitet kompetente policore”, ka thënë Elezaj./teve1.info/
