Qehaja pyet se si mund të ketë një profesor punime shkencore kur nuk e di gjuhën angleze?
“Si mundet një profesor universitar me 150 studenta në mentorim e me tërë javën në ligjërata të të ketë atë numër kaq të madh të publikimeve e hiq më shumë si mundet të ketë at numër të madh të publikimeve një profesor që mungon në gjuhën angleze?”, ka thënë ai në emisionin “Ditari” në Tëvë1.
Ai thotë se nga publikimet shkencore të profesorëve përfitues është vetëm profesori e jo studenti e as Universiteti, e sipas tij Kosovës nuk i duhen profesorë që shërbejnë për avancimet e tyre por që nevojiten publikime të profesorëve që i gjenerojnë të hyra universitetit.
“Publikimi në thelb e ka njëfarë shkence mbrapa të bërit shkencë dhe i shërben një kontributi social shkencor që të përfitojë opinioni nga ajo se çfarë prodhohet si publikim, mirëpo tek ne nga publikimi i profesorëve universitarë përfitues të vetëm është profesori dhe jo studenti e as Universiteti. Neve nuk na nevojiten publikime të profesorëve që shërbejnë për avancimet e tyre por na nevojiten publikime të profesorëve që i gjenerojnë të hyra universitetit i sjellin financime nga skema ndërkombëtare të hulumtimeve dhe mbi të gjitha i shërben vet studentit”, tha ai.
Qehaja thekson se UP-ja apo edhe universitetet e tjera publike duhet të kthehen në universitete ndërmarrëse, sepse në Kosovë nuk mund të bëhet shkencë aq lehtë. Ai thotë se Universiteti i Prishtinës është ngulfatur në burokraci administrative të publikimeve.
“Unë kam friken që Universiteti i Prishtinës është ngulfatur në këto burokraci administrative të publikimeve, ndërkaq jo në shërbim të studenteve. Universiteti i Prishtinës dhe të gjitha universitet publike duhet të kthehen në universitete ndërmarrëse, këtu shkencë nuk mund të bëhet aq lehtë, ata që janë të interesuar për shkencë lë të ndahen si të tillë, ndërkaq studenteve tanë iu intereson ai profesor që ka një kompetencë profesionale në një ekspertizë nga fusha dhe nga tregu i punës dhe të njëjtën ia kthen si shkathtësi që i shërben tutje për punësim”, shtoi Qehaja.
Në fund ai tha se Kosovës nuk i nevojiten profesorë që nuk e kanë të njohur “as syllabusin e tyre, që thirren në tituj mirëpo që ata tituj dhe ajo kompetencë e tij nuk i shërben fare studentëve”. /teve1.info/
