Ministria e Arsimit është duke e shqyrtuar mundësinë që këtë vit t’i transferojë mjetet financiare në llogaritë e prindërve, në mënyrë që ata t’i blejnë tekstet shkollore për fëmijët e tyre.
Duke diskutuar për mundësinë se a mundet një gjë e tillë të shkaktojë probleme në mbarëvajtjen e fillimit të procesit mësimore, Rinor Qehaja nga Instituti Edguard, vlerësoi se mësimdhënësit në Kosovë janë shumë të kufizuar nga tekstet shkollore, saqë sipas tij, kjo krijon probleme.
“Teksti shkollor nuk është epiqendër e mësimdhënies, por fatkeqësia në Kosovë është që mësimdhënësit tanë kufizohen shumë në tekste shkollore. Teksti shkollor është burimi i vetëm i punës së tyre, gjë që s’do duhej të ishte. Ky debat nuk do ta kishte këtë relevancë që ka sot, sikur mësimdhënësit tanë nuk do të ishin kaq të varur nga testet shkollore. Ende e kemi të pa qartë se cili është çmimi i negociuar i Ministrisë dhe e kemi të paqartë se cili do të jetë çmimi që do të prezantohet për subvencionim të prindërve për blerjen e teksteve shkollore”, deklaroi Qehaja në emisionin “Ditari”.
Më tej, Qehaja tha se Kosova është afër dixhitalizimit të materialeve mësimore për nxënësit.
“Kosova është shumë afër dixhitalizmit, pasi që fëmijët kanë një prezencë të jashtëzakonshme në përmbajtje dixhitale. Pra, vetëm nevojitet që e njëjta të konvertohet në diçka edukative, ose të bëhet pjesë e procesit mësimor”, shtoi tutje Qehaja në Tëvë1.
Kujtojmë se ministrja e Arsimit, Shkencës, Teknologjisë dhe Inovacionit, Arbërie Nagavci, ka thënë se furnizimi i nxënësve me tekste shkollore nga ministria ka qenë mjaft sfidues në vitet e mëparshme, për shkak se “ky proces ka qenë jo gjithmonë i drejtë dhe cilësor”.
Ajo theksoi se tani ministria ka menduar ta ndryshojë strategjinë dhe do të vendosë brenda pak ditëve për planin e ri për blerjen e teksteve shkollore për nxënësit./teve1.info/
