Një varg me kritika në konferencën përgatitore, u adresuan nga mbrojtësit e ish krerëve të UÇK-së.
Ata konsiderojnë se afatet e vendosura për paraqitje të provave dhe çështjes, nuk janë në proporcion me afatet që i ishin dhënë prokurorisë.
Qasjet e tilla nga Gjykata Speciale, po vlerësohen se nënkuptojnë anshmëri të trupit gjykues ndaj Zyrës së Prokurorit të Specializuar.
“Çdo kufizim apo shkurtim i afateve kohore, duke iu ofruar më pak hapësirë, më pak mundësi, më pak kohë mbrojtjes, mund të konsiderohet e të trajtohet si trajtim i pafavorshëm me prokurorinë. Për ne është shumë e rëndësishme që edhe në pamje e edhe në veprime, trupi gjykues të trajtojë në mënyrë të njëjtë dhe të barabartë të dy palët. Çdo mosrespektim i këtij parimi ngjallë dyshime apo reagime se mund në njëfarë mënyre trupi gjykues po e trajton në mënyrë më të privilegjuar prokurorinë, në dëm të mbrojtjes”, ka thënë Ehat Miftari nga Instituti i Kosovës për Drejtësi.
Bazuar në qasjen përgjatë gjykimit të trupit gjykues karshi ekipeve mbrojtëse të ish krerëve të UÇK-së dhe parashtrimeve të tyre, vlerësohet si e nevojshme kërkesa për përjashtim të trupit gjykues.
“Po çuditem që deri më sot, mbrojtja nuk ka kërkuar përjashtimin e trupit gjykues. Dhe të kërkonte nga kryetarja e Dhomave të Specializuara, që ta ndryshojë përbërjen e trupit gjykues. Sepse mbrojtjes, por edhe neve si publik e si Kosovë, u ka humbur besimi në këtë përbërje të trupit gjykues, dhe kemi shumë skepticizëm dhe dyshime se do të ketë gjykim të drejtë, objektiv dhe të mbështetur në parimet themelore të drejtësisë”, është shprehur avokati Xhevdet Smakiqi.
Seanca e radhës për çështjen e katërshes do të mbahet në fund të muajit gusht, përderisa që nga java e ardhshme, Dhomat e Specializuara do të shkojnë në pushim veror.
Në seancën e djeshme, mbrojtja e ish-Presidentit Hashim Thaçi, konfirmuan se synojnë t’i thërrasin 12 dëshmitarë, ndërkaq mbrojtja e Jakup Krasniqit, treguan se synojnë t’i thërrasin vetëm pesë dëshmitarë.
