Ish-drejtori i Policisë së Kosovës dhe deputeti i PDK-së, Rashit Qalaj, e ka akuzuar ministrin e Punëve të Brendshme, Xhelal Sveçla, se e ka shkarkuar drejtorin e Krimeve Ekonomike të Policisë së Kosovës, Musli Salihu, pas bastisjes së drejtorit të KERK-ut, Nagip Krasniqi.
Gjatë fjalimit të tij në Kuvendin e Kosovës, Qalaj tha se Musli Salihu është shkarkuar pas bastisjes së Nagip Krasniqit, shef i KEK-ut dhe ish-aktivist i Vetëvendosjes.
“Menjëherë pas deklarimit të z. Sveçla se nuk është i kënaqur me një segment të Prokurorisë… shkarkohet drejtori i Krimeve Ekonomike”, tha ndër të tjera Qalaj.
Ai deklaroi se Policia e Kosovës ka gënjyer, siç u shpreh Qalaj, se Krimet Ekonomike asnjëherë nuk kanë qenë duke e hetuar Krasniqin.
“Policia e Kosovës fatkeqësisht tha të pavërteta. Tha se ky rast është duke u hetuar nga njësiti anti-korrupsion, mirëpo nuk është e vërtetë që nuk është hetuar nga krimet ekonomike”, deklaroi deputeti Qalaj.
Ai e kritikoi qeverinë edhe për keqtrajtim të shefave të divizioneve të Policisë, për çka tha se ministri Xhelal Sveçla i ka mbajtur 12 orë në një objekt në Parkun Nacional në Blinajë.
