Deputeti i Partisë Demokratike të Kosovës (PDK), Rashit Qalaj ka vlerësuar se vendimi i BQK-së për ndalimin e qarkullimit të dinarit është absolutisht i drejtë, por diskutabile e ka parë mënyrën e implementimit të këtij vendimi.
Për Qalajn, propozimi i lëshuar sot nga BQK-ja me fazën e tranzicionit prej 3 muajsh, të zbatimit të rregullores së saj, e cila e ndalon përdorimin e dinarit serb është dashur të ndodhë qysh në fillim.
Sipas tij, Qeveria është dashur t’i përdorë të gjitha instrumentet që ky vendim të kaloj pa ndonjë zhurmë.
“Vendimi i marr nga BQK-ja në lidhje me dinarin absolutisht nuk ka ndonjë diskutim që është vendim i drejtë, por krejt ky diskutim që është bërë, qoftë në studio televizive, qoftë në komisione parlamentare apo nga faktorët ndërkombëtarë ka të bëjë më mënyrën e implementimit të asaj rregullore. Qeveria është dashtë që të kujdeset që kur të merret një vendim të jetë i suksesshëm në implementim. Është dashtë që ajo që ka ndodhur sot me këtë propozimin e BQK-së të jetë që nga fillimi. Pra që qeveria t’u lënë hapësirë të mjaftueshëm komunitetit serbë duke i informuar dhe t’i përdorë të gjitha instrumente që ky vendim të bëhet pa ndonjë zhurmë”, është shprehur ai në emisionin “Këndi i Debatit” në Tëvë 1.
Më tej, ai ka komentuar edhe protestën e sotme të qyterëve serbë në veri, për të cilët tha se janë njerëz të instrumentalizuar nga Serbia.
Qalaj ka theksur se raste të tilla janë parë edhe më herët në Kosovë, në periudhën e para dhe pas luftës.
“Këta njerëz që i pamë në protestë janë të instrumentalizuar nga shteti i Serbisë, janë njerëz që Serbia i ka detyruar të dalin aty, janë kryesisht pensioner, gra e fëmijë. I kemi parë këto skena para e pas luftës në shumë raste. E kam pritur këtë situatë pas fjalimit të presidentit të Serbisë në Këshillin e Sigurimit” ka shtuar ai.
Ndryshe, Banka Qendrore e Kosovës (BQK) ka njoftuar se faza e tranzicionit të zbatimit të rregullores së saj, e cila e ndalon përdorimin e dinarit serb, nuk mund të zgjasë më shumë se tre muaj. Në një njoftim të publikuar të hënën BQK ka prezantuar Planin e veprimit shtesë. /teve1.info/
