Deputeti i PDK-së, Rashit Qalaj, në studion e emisionit “Këndi i Debatit” ka treguar se personalisht e ka njohur heroin Afrim Bunjakun.
Qalaj e cilësoi të emocionueshme videon në të cilën e publikoi ekskluzivisht Tëvë1, ku heroi Bunjaku po shihej duke patrulluar pak para sulmit terrorist.
“Emocionuese të shohësh ish-kolegun tim – rreshterin e Policisë së Kosovës e heroin e Kosovës Afrim Bunjaku, fare pak momentit para se të kryhej akti terrorist”, tha ai.
Deputeti opozitar tregoi që heroin Bunjaku e ka njohur edhe personalisht gjatë punës në akademi policore.
“E kam njohur personalisht. E kam njohur edhe në akademi sa kam punuar. E meriton çdo respekt për punën që e ka bërë e sidomos për aktin e fundit, sakrificën që ka bërë që shtet i Kosovës të mos rrezikohet nga terroristët”, tha ai.
Me rastin e 1 vjetorit të rënies heroike të rreshterit të Policisë së Kosovës, Afrim Bunjaku i cili u vra më 24 shtator në Banjskë të Zveçanit pasi që një grup terrorist serb sulmuan policinë e Kosovës, kryeministri i vendit, Albin Kurti, kryeparlamentari Glauk Konjufca, ministra, deputet dhe ambasadori amerikan, Jeffrey Hovenier bënë homazhe te varri i Afrim Bunjakut.
