Paneli Zgjedhor për Ankesa dhe Parashtresa ka pranuar ankesën e LDK-së, lidhur me vendimin e KQZ-së, lidhur me hapësirat për votim jashtë vendit.
Sipas vendimit të PZAP-së, votimi jashtë vendi mund të organizohet vetëm në përfaqësitë diplomatike dhe hapësirat e tyre.
Lajmin e ka bërë të ditur zëdhënësi i Komunës së Prishtinës, Donat Lushaku.
“PZAP pranoj si të bazuar ankesën e LDK, ashtu që përfaqësitë diplomatike dhe hapësirat e tyre do të jenë Qendra të Votimit jashtë Kosovës për zgjedhjet e 28 dhjetorit; dhe jo hapësirat e tjera alternative”, ka shkruar ai në Facebook.
“Pranohet e bazuar ankesa e datës 27.11.2025 e parashtruar nga subjekti politik Lidhja Demokratike e Kosovës (LDK) me seli në Prishtinë, NDRYSHOHET Vendimi Nr.01/3438- 2025, i datës 26.11.2025 i Komisionit Qendror i Zgjedhjeve, sa i përket Qendrave të Votimit jashtë Kosovës, numrit të vendvotimeve si dhe listën e qendrave të votimit, ashtu që Qendra të Votimit jashtë Kosovës për Zgjedhjet e Parakohshme për Kuvendin e Republikës së Kosovës, që do të mbahen me 28 dhjetor 2025, caktohen përfaqësitë diplomatike të Republikës së Kosovës apo hapësirat e tyre. Lista e Qendrave të Votimit, si në pikën I të këtij vendimi përbëhet vetëm nga Qendrat e Votimit në përfaqësitë diplomatike të Republikës së Kosovës apo hapësirat e tyre”, thuhet në vendim.
