Paneli Zgjedhor për Ankesa dhe Parashtresa (PZAP) ka vendosur masa ndëshkuese ndaj disa subjekteve politike dhe kandidatëve, pas konstatimit të shkeljeve të rregullave të fushatës në zgjedhjet lokale në Kosovë.
Sipas vendimeve të fundit, Lëvizja Vetëvendosje është gjobitur me 2,000 euro, pas ankesës së Partisë Demokratike të Kosovës (PDK) ndaj kandidatit të saj për kryetar të Komunës së Shtimes, Qemajl Aliu.
PZAP ka konstatuar se Aliu ka përdorur burime publike për qëllime elektorale, duke përfshirë rrjetin zyrtar të Facebook-ut të Komunës së Shtimes, ku ishte publikuar një postim me fotografinë dhe sloganin e tij zgjedhor.
Në postim, ndër të tjera, ishte shkruar se “mbështetjen e fuqishme për klub e garave nuk do ta ndal as gjatë mandatit të ardhshëm”, që PZAP e vlerësoi si përpjekje për përfitim politik.
Në anën tjetër, PDK-ja u gjobit me 500 euro, pas ankesës së Lëvizjes Vetëvendosje, për shkak se kandidati i saj për Asamble Komunale, Ilirik Musliu, kishte vendosur materiale reklamuese në një zonë të palejuar — konkretisht në udhëkryqin mes Rrugës B dhe Rrugës “Enver Maloku” në Prishtinë.
Përveç këtyre dy subjekteve kryesore, PZAP ka ndëshkuar edhe:
Iniciativën Qytetare “Novo Lice – Narodna Pravda” me 800 euro,
kandidatin e pavarur për Dragash, Nedzmidin Sejdilar, me 1,000 euro, dhe
Listën Serbe, po ashtu me 800 euro.
Këto gjoba janë vendosur si pjesë e monitorimit të rregullt të fushatës zgjedhore, për të siguruar respektimin e barazisë ndërmjet subjekteve politike dhe ndarjen e qartë midis institucioneve publike dhe aktiviteteve elektorale.
