Presidenti rus, Vladimir Putin ka falënderuar Korenë e Veriut të hënën për ndihmë e trupave të tyre në luftë kundër forcave ukrainase duke premtuar se nuk do harrojnë sakrificat e tyre.
Kjo erdhi disa orë pasi Koreja e Veriut konfirmoi dislokimin e saj për herë të parë, raporton AP.
Në një deklaratë të postuar në faqen e internetit të Kremlinit, Putin vlerësoi ushtarët koreano-veriorë , të cilët tha se “sup më krah me luftëtarët rusë, mbrojtën Atdheun tonë si të tyrin”.
Deklaratat e njëpasnjëshme ruse dhe koreano-veriore – të cilat ilustrojnë partneritetin e tyre ushtarak në zgjerim – erdhën dy ditë pasi Rusia tha se trupat e saj kanë rimarrë plotësisht rajonin e Kurskut që forcat ukrainase pushtuan në një inkursion të papritur vitin e kaluar.
Më herët të hënën, Komisioni Qendror Ushtarak i Koresë së Veriut njoftoi se udhëheqësi Kim Jong Un kishte vendosur të dërgonte trupa në Rusi për të “asgjësuar dhe zhdukur pushtuesit neonazistë ukrainas dhe për të çliruar zonën e Kurskut në bashkëpunim me forcat e armatosura ruse”. Komisioni tha se trupat e Koresë së Veriut përfundimisht dhanë “një kontribut të rëndësishëm” në rikthimin e territorit kufitar nga Rusia.
Ky ishte konfirmimi i parë zyrtar i Koresë së Veriut për vendosjen e trupave të saj në Rusi, megjithëse ajo ka shprehur vazhdimisht mbështetjen e saj të palëkundur për luftimet e Rusisë kundër Ukrainës.
Zyrtarët ukrainas e kanë mohuar pretendimin, duke këmbëngulur se operacioni në zona të caktuara të Kurskut po vazhdon.
Zyrtarët e inteligjencës së SHBA, Koresë së Jugut dhe Ukrainës kanë thënë se Koreja e Veriut dërgoi 10,000-12,000 trupa në Rusi vjeshtën e kaluar në pjesëmarrjen e saj të parë në një konflikt të madh të armatosur që nga Lufta Koreane e viteve 1950-1953.
Përveç dërgimit të trupave, Koreja e Veriut ka furnizuar Rusinë me një sasi të madhe armësh konvencionale.
Koreja e Jugut dhe SHBA shqetësohen se Rusia mund ta shpërblejë Korenë e Veriut duke transferuar teknologji të nivelit të lartë të armëve që mund të përmirësojnë programin e saj të armëve bërthamore, si dhe ndihma të tjera ushtarake dhe ekonomike.
