Një ditë pas mbajtjes së zgjedhjeve në veri të vendit, proces ky që rezultoi me daljen minimale të komunitetit serb, Qeveria e Kosovës i ka kërkuar Bashkimit Evropian heqjen e masave ndëshkuese, pas përmbushjes së obligimit të organizimit të këtyre zgjedhjeve.
Për t’i hequr masat ndëshkuese, Bashkimi Evropian fillimisht kërkoi kushte.
Një ndër to ishte edhe organizimi i zgjedhjeve të reja në katër komunat veriore.
E kur edhe ky kusht u plotësua dhe institucionet e Kosovës organizuan proces votimi për largimin e katër kryetarëve të komunave në veri të vendit, Qeveria e Kosovës ka kërkuar nga Bashkimi Evropian që t’i heqë masat e vendosura.
“Me përfundimin e këtij procesi, pa marrë parasysh rezultatin, Republika e Kosovës ka përmbushur obligimin e saj ndaj qytetarëve të saj dhe përgjegjësinë e marrë nga dakordimi me Bashkimin Evropian për deeskalimin e situatës në veri të vendit. Andaj, pas votimit të djeshëm, është koha që masat e padrejta ndaj Kosovës përfundimisht të largohen.”
Tutje në komunikatën e Qeverisë thuhet se rezultatet e votimit të së dielës tregojnë se nuk ka vullnet për shkarkim të kryetarëve.
Largimin e masave ndëshkuese e kanë kërkuar edhe partitë opozitare.
Se është shtruar rruga për largimin e masave ndëshkuese e thotë edhe profesori i të Marrëdhënieve Ndërkombëtare Dritëro Arifi.
“Bashkimi Evropian të largojë masa që këtë javë dhe tëpërqojë mesazhin që pala që u tregu konstruktive do të shpërblehet dhe kjo do të ishte mesazh shumëdimensional edhe për serbët e Kosovës që do ti detyronte me dashje ose pa dashje që të integrohen në sistemin e Kosovës dhe Serbisë një flakaresh që nëse ju tregoheni jo konstruktiv ne do tëavancojmë Kosovën edhe më tutje.”, tha profesori i marrëdhënieve dnërkombëtare, Dritëro Arifi.
Edhe presidentja e vendit Vjosa Osmani ka kërkuar të hiqen masat e BE-së, pasi thotë se me organizimin e procesit zgjedhor Kosova i ka plotësuar të gjitha kushtet e kërkuara nga BE-ja.
Gresa Bardhecaj
