Punëtorët teknikë të sektorit privat të shkollës ‘’Dardania’’ në Prishtinë, grevën po e mbajnë gjatë gjithë orarit të punës.
E kërkesat e tyre janë rritja dhe nivelizimi i pagës me atë të sektorit publik.
“Na n’grevë jem përmes sindikatës, jo krye n’veti, k’tu jem për rrogë, rroga është nën minimalen që e ka dhanë qeveria. Kush s’po merr masa edhe tash jemi në grevë, te shohim çfarë veprime po bën komuna”, shprehet Ismet Vllasaliu.
“Na jemi n’grevë, këtë e duam, vetëm nivelizim, kurgjo më shumë me kolegët tonë. Përndryshe, për bërllogjet nëpër shkolla, nuk është ndjenjë e mirë po masi jemi në grevë, s’kemi çka me bo”, thotë Selman Mavriqi, protestues.
E për punëtorin Xhemajl Xhakaliu i cili tash e 30 vite punon në këtë shkollë – është e vështirë t’ia del me pagën që e merr.
“Për neve është tepër e vështirë se me 250 euro, flas vetëm për vete, shërbimet komunale nuk mundemi me i kry, e lëre më të mbajmë familje kah 5-6 anëtarë”, thotë ai.
E ndonëse Sindikata e Pavarur e Sektorit Privat bëri të ditur se Komuna e Prishtinës do të ofrojë një ofertë për rritjen e pagës së punëtorëve grevist, gjatë së mërkurës nuk u bë një gjë e tillë.
