Ka dhjetë ditë që punëtorët teknikë të Kuvendit të Kosovës po mbajnë grevë për shkak të pagave të ulëta. Për to është bërë e vështirë jetesa, andaj kërkojnë rritje të pagës nga 270 në 550 euro, teksa thanë se mbështetje kanë marrë nga kabineti i Kuvendit.
Mbi dy dekada janë pjesë e Kuvendit të Kosovës.
E për mirëmbajtjen e tij janë kujdesur çdo herë.
Por 15 gra, punëtore teknike të këtij institucioni, tash e dhjetë ditë po mbajnë grevë.
Kjo për shkak të pagave të ulëta.
Në mesin e tyre është edhe Miradije Jakupi, të cilës pesë anëtarë të familjes i ranë dëshmorë për lirinë e Kosovës.
Jakupi me pagën që mori, i rriti dy djemtë jetimë.
Por për të është bërë tashmë e vështirë jetesa me këtë pagë.
E kërkesë e tyre është që paga t’u rritet në 550 euro.
Derisa për këtë, punëtoret teknike thanë se kanë marrë mbështetje nga kabineti i Kuvendit.
Ndërsa qëndrimi në grevë pavarësisht vështirësive që kanë do të vazhdojë deri në plotësimin e kërkesave.
Greva po mbahet në oborrin e Kuvendit të Kosovës.
