Punëtorët e ndërmarrjes publike “Trafiku Urban” po presin që mbledhja e jashtëzakonshme e Kuvendit të Prishtinës, e thirrur për ditën e nesërme, të sjellë zgjidhjen e shumëkërkuar për situatën e tyre të rënduar financiare.
Përfaqësuesi i punëtorëve, Ilmi Gashi, shpreson që institucioni komunal do të marrë vendimin që u mundëson marrjen e pagave të prapambetura.
Gashi, i cili me kolegët e tij po proteston para objektit të Komunës së Prishtinës për të kërkuar pagën – të cilën e konsiderojnë një të drejtë elementare – tha se mbledhja e nesërme është legjitime dhe pritet të adresojë çështjen e tyre.
Ai theksoi se nëse nesër nuk merret një vendim konkret, greva do të vazhdojë deri në alokimin e mjeteve nga institucionet kompetente.
“Shpresojmë që mbledhja e nesërme të përfundojë me vendime të arsyeshme. Procesi është i rregullt dhe i ligjshëm. Nëse në Asamble bëhet votimi, vendimi do t’i dërgohet Ministrisë, e cila pastaj duhet të alokojë mjetet. Ne besojmë dhe shpresojmë se kjo do të ndodhë”, deklaroi ai.
Që nga e hëna, kryeqyteti ka mbetur pa qarkullim të autobusëve të “Trafikut Urban”, pasi punëtorët kanë ndalur punën për shkak të mosmarrjes së pagave dhe mungesës së karburantit për operim.
