Sipas tij, qëndrimi i Francës do të jetë përcaktues për liberalizimin e vizave për Kosovën.
“Nëse Franca nuk ndërron qëndrim dhe nuk bën kthesë politike e cila i është kërkuar edhe nga Gjermania atëherë Ballkani Perëndimor nuk do merr atë çfarë neve e presim qoftë Shqipëria me Maqedoninë, e qoftë Kosova për sa i përket vizave. Pra do ngelemi prap në pritje në shpresën se në samitin e radhës mund të ndodhë diçka”, tha Pula në emisionin “Ditari”.
Ai theksoi se ajo çfarë do të duhej të ndodhte brenda Unionit Evropian, është që të krijohet një guxim politik dhe të rikthehet vëmendja të vizioni për Evropën dhe Ballkanin Perëndimor, që sipas tij, ta ofrojë afër vetës duke e ndihmuar në hapat që duhet ndërmarrë.
“Një seriozitet më i madh nga ana e Brukselit zyrtar do ishte i mirëseardhur, pa një guxim politik pa një vullnet politik, pa një qasje të drejtë dhe jo dualiste, pa një qasje jo me standarde të dyfishta prosperiteti dhe e ardhmja e Ballkanit Perëndimor mbetet vetëm në dëshira dhe në të ushqyerit e shpresës që do të thosha shpresë të rrejshme”, tha ai.
Kurse në Samitin e Bashkimit Evropian, që zhvillohet të enjten dhe të premten në Bruksel, do të përsëritet përkushtimi i BE-së, për perspektivën e anëtarësimit për vendet e Ballkanit Perëndimor, ndërsa do t’u ndahet statusi i kandidatit dy vendeve, Ukrainës dhe Moldavisë./teve1.info/
