Pula thotë se në këtë Samit ka një dozë cinizmi pasi që sipas tij, aty është thënë që duhet t’i hiqen vizat të gjithë Ballkanit Perëndimor e që në fakt thekson se Kosova është i vetmi vend që ende nuk ka liberalizim të vizave në Ballkanin Perëndimor.
“Në këto 6 konkluzione të dala sot sikur ka një dozë cinizmi për faktin që thuhet t’i hiqen vizat të gjithë Ballkanit Perëndimor, në fakt jemi ne ata që e kemi ende regjimin e vizave dhe do të duhej të theksohet me domosdoshmëri që Brukseli zyrtar të këndellet dhe të marrë një vendim, në këtë rast Këshilli Evropian do të duhet të marrë një vendim, të heq regjimin e vizave për Kosovën”, tha Pula.
Gjatë këtij Samiti i cili u mbajt të hënën në Slloveni, u kërkua liberalizimi i vizave për Kosovën si dhe u vlerësua se vazhdimi i dialogut ndërmjet Kosovës dhe Serbisë është i rëndësishëm për ruajtjen e paqes dhe stabilitetit.
Përndryshe Samiti Brdo – Brijuni ka filluar në vitin 2010 nga dy vende siç është Sllovenia dhe Kroacia. Qëllimi ka qenë që shtetet e Ballkanit Perëndimor të përafrohen mes vete, të ndërtojnë marrëdhënie të ndërsjella normale dhe të kultivojnë frymën e bashkëpunimit.
Gjashtë konkluzionet e Samitit të Brdo-Brionit:
Ne kemi përsëritur se politika e zgjerimit të BE-së është kontribuuesi më i drejtpërdrejt për mbajtjen e paqes dhe stabilitetit në rajonin tonë dhe më tepër se kurrë është një çështje gjeopolitike.
Ne bëjmë thirrje për përshpejtimin e procesit të integrimit në BE, në përputhje me kushtet mirë të vendosura për anëtarësim në BE.
Bëjmë thirrje që t’i ofrohet statusi i kandidatit Bosnjë-Hercegovinës deri në fund të vitit 2022.
Bëjmë thirrje që të hiqet regjimi i vizave për gjithë Ballkanin Perëndimor, deri në fund të vitit 2022.
Ne i bëjmë thirrje BE-së që të qëndrojë krah për krah me Ballkanin Perëndimor për zbutje të pasojave të krizës ekonomike dhe energjetike.
Ne rikonfirmojmë përkushtimin tonë të fuqishëm se dialogu është zgjidhja e vetme e zbatueshme për dallimet që ekzistojnë dhe për çështjet e hapura politike në rajon.
