Njohësi i marrëdhënieve ndërkombëtare, Shqiprim Pula, ka dalë kundër deklarimeve të ambasadorëve të akredituar në Kosovës, se nënshkrimi i marrëveshjeve me Serbinë, nuk është kusht për zbatimin e tyre.
Pula ka thënë se nënshkrimi është detyrim, ai këtë e ka bazuar se Kosova ka të bëjë me një shtet fqinj problematikë.
“Po na thonë ambasadorët nuk është detyrim të bëhet nënshkrimi i dokumenteve me Serbinë. Ne nuk jemi as federata zvicerane e as Principata e Lihtenshtajnit. Ne kemi përballë një fqinj problematik shekullor, ne duhet të kemi marrëveshje të nënshkruara me ta, të kemi garanci me ta”, ka thënë Pula në emisionin “Këndi i Debatit” në Tëvë 1.
Ambasadori amerikan në Kosovë, Jeffrey Hovenier, lidhur më nënshkrimin e marrëveshjeve që po insiston Kurti, tha se më e rëndësishme është ecja përpara.
“Nga këndvështrimi ynë, ndërsa ne e pranojmë interesin e Kryeministrit Kurti për të pasur një nënshkrim, mendojmë se është shumë më pak e rëndësishme sesa rëndësia aktuale që të ecim përpara me zbatimin e plotë dhe të plotë të të gjitha detyrimeve të marrëveshjes nga të dyja palët”, ishte shprehur ambasadori.
Kryeministri i Kosovës, Albin Kurti, ka thënë se duhet të ketë nënshkrim të marrëveshjeve dhe se për këtë ai është i gatshëm.
