Të pranishëm gjatë takimit të krerëve të dy shteteve do të jenë edhe përfaqësuesi i lartë i Bashkimit Evropian, Josep Borrell dhe përfaqësuesit special për dialogun, Miroslav Lajçak.
Në njoftimin e publikuar në faqen zyrtare të BE-së, thuhet se takimi nis në orën 10:30 dhe do të fokusohet në rrugën përpara në dialog si dhe arritjen e një marrëveshjeje gjithëpërfshirëse të normalizimit të marrëdhënieve.
Po ashtu, gjatë takimit do të trajtohen çështjet aktuale dhe do të synohet zbutja e tensioneve mes palëve.
Gjithashtu, përfaqësuesi i lartë i BE-së do të zhvillojë takime të veçanta me secilin lider.
Kurse, në fund të takimit përfaqësuesi i lartë i BE-së, Josep Borrell do të mbajë një deklaratë për mediat.
Deklarata nga Përfaqësuesi i Lartë Borrell do të transmetohet drejtpërdrejt në faqen zyrtare të BE-së dhe do të publikohet në faqen e internetit të (EEAS).
Ndërkohë në prag të takimeve në Bruksel, Kryeministri i Albin Kurti, së bashku me Zëvendëskryeministrin Besnik Bislimi, takuan të martën më 16 gusht përfaqësuesin e Posaçëm të Bashkimit Evropian në Kosovë dhe ambasadorët e shteteve të QUINT-it.
Në fokus të takimit ishin edhe takimet e ardhshme në Bruksel si dhe proceset e çështjet lidhur me dialogun ndërmjet Kosovës dhe Serbisë.
Gjatë takimit u theksua përkushtimi për vazhdimin e bashkëpunimit dhe bashkërendimit ndërmjet Qeverisë së Republikës së Kosovës dhe përfaqësuesve të Bashkimit Evropian, Shteteve të Bashkuara të Amerikës, Gjermanisë, Mbretërisë së Bashkuar, Francës dhe Italisë.
