Kryeministri i Kosovës, Albin Kurti, ka shmangur një përgjigje të drejtpërdrejtë lidhur me pyetjen pse nuk po e propozojnë Vjosa Osmani për një mandat të ri në postin e presidentes.
Pas takimit me kreun e Lidhja Demokratike e Kosovës, Lumir Abdixhiku, Kurti e fokusoi përgjigjen te numrat e nevojshëm në Kuvend për zgjedhjen e presidentit.
Sipas tij, mazhoranca nuk mund të rrezikojë një votim pa siguruar paraprakisht mbështetje të mjaftueshme.
“Ne duhet t’i kemi 80 veta të cilët qëndrojnë në sallë dhe votojnë minimalisht. Konsiderojmë që nuk mund të shkojmë me 80 në votim. Po doli 79 numri në fund, automatikisht shkojmë në zgjedhje. E kemi prioritet absolut, në situatën aktuale politike, evitimin e zgjedhjeve”, tha Kurti.
Ai theksoi se për të qenë të sigurt në rezultat, nevojiten më shumë se minimumi kushtetues.
“Duhet të sigurohemi jo që t’i kemi 80, por t’i kemi rreth 84-85. Për këtë është duke u bërë beteja me komunikimet dhe takimet që po i zhvillojmë”, u shpreh ai.
Kurti shtoi se as 30 deputetë për të propozuar një kandidat dhe as 80 vota të siguruara në letër nuk janë të mjaftueshme për ta konsideruar procesin të garantuar.
“Tash, 30-shi nuk zgjidh punë. Edhe një herë po e theksoj, as 80-shi nuk është garanci. Duhen 84 ose 85 që të jemi të sigurt për 80”, deklaroi kryeministri.
Zgjedhja e presidentit kërkon praninë e të paktën 80 deputetëve në sallë, ndërsa dështimi për ta arritur këtë kuorum do ta çonte vendin në zgjedhje të reja parlamentare — një skenar që, sipas Kurtit, po tentohet të shmanget me çdo kusht.
