Pikëtakimin e kishin para Kuvendit të Kosovës.
E qysh në hyrje, u paralajmëruan befasi.
Këtë fat të dielën, nuk e pati Adriana Matoshi nga Lëvizja Vetëvendosje.
Por, as 3 bashkëpartiakët e saj që u propozuan për të parin e Kuvendit të Kosovës, nuk i mblodhën votat e mjaftueshme.
Dy ministrat në detyrë, Hekuran Murati e Arbërie Nagavci, morën vetëm 55 vota pro.
E dy më shumë, mori i propozuari i tretë, deputeti Dimal Basha.
Kjo meqë votë pro Bashës kishin Arben Gashi nga LDK dhe Bekë Berisha nga AAK.
Pas seancës, Gashi e Berisha treguan pse votuan pro Bashës.
“Ma ka kërkuar votën dhe i kam premtuar se do ta votoj. Para disa muajve nuk e kam ditur se do të del në votim por i kam thënë kurdo që të qesin votën time e ke. Është një djalë simpatik dhe mendoj se duhet pak me mendua përtej, nuk është shumë polarizues i ka disa deklarata të forta përtej të arsyeshmes por në përgjithësi nuk ka një të kaluar që e pengon me bë një punë”, tha deputeti i LDK-së, Arben Gashi.
“Nuk ka pasur asnjë detyrë qeveritare, mos harroni që kemi thënë që edhe kanë qenë më pak njerëzor dhe munden me kriju njëfarë lloj që dinë me vet e me të thanë mirëdita. Për këta të tjerët nuk mundem me fol vetëm për veti”, ka thënë Gashi.
Votë pro Dimal Bashës, nuk pati as Partia Demokratike e Kosovës.
Ani pse këta të fundit deklaruan se do ta votojnë kandidatin që nuk ishte pjesë e kabinetit qeveritar.
Arsyet pse nuk votuan për, i tregoi vet i pari i PDK-së, Memli Krasniqi.
“Nuk na mundësuan një pauzë 10-minutëshe nga e cila do të mund ta votonim një kryetar Kuvendi, edhe nëse do të ishte Dimal Basha. Tek e fundit këta njerëz i ka Vetëvendosja. Shpresoj që pasnesër të mos ketë arrogancë të njëjtë Dehari, dhe nëse ka propozim që mund t’i marrë votat e PDK-së të na jap një pauzë 10-minutëshe Nuk bëhet në mënyrë klandestine. Me muaj të tërë po iu themi propozone një njeri që i merr votat, edhe tash e nxjerr prej gjepit sikur me qen loto këtu, nuk është loto këtu, nuk luhet loto me fatin e qytetarët e të institucioneve të vendit”, u shpreh Krasniqi.
Propozimet e VV-së, zunë në befasi të dielën edhe AAK-në.
“Duhet konsultim mes grupeve parlamentare se si do të veprojë. Ne i kemi dhënë disa qëndrime e emra që me automatizëm do t’i votonim, por për kandidatët e tjerë duhet konsultë paraprake, gjë që është mohuar edhe nuk kanë pranuar që të diskutohet”, tha Kadrijaj.
E nga LDK, thonë se s’ka votë pa marrëveshje politike.
“Nuk votojmë asnjë kandidat të asnjë partie me të cilën nuk kemi asnjë marrëveshje paraprake politike, njësoj vepruam dhe sot pavarësisht emrave që propozoi. LDK-ja mbetet konsistente, kemi qëndrimin e njëjtë që kemi pasur, do ta vazhdojmë ta kemi”, tha deputeti i LDK-sw, Besian Mustafa.
Ndërkohë VV, thotë se Kuvendi nuk u konstatua meqë PDK nuk e mbajti fjalën.
“Siç thotë edhe populli, iu hoq peta laknorit dhe u dëshmua që për më shumë se katër muaj tash kjo opozitë po e mban Kuvendin të bllokuar.. Na thanë ndryshojeni kandidatin, e ndryshuam, na thanë jo dikë të Qeverisë, e propozuam edhe dikë, pra këto kanë qenë arsyetime në vazhdimësi për ta zvarritur kohën, është kohë e humbur. Ata po kërkojnë figurë uniteti por në fakt uniteti duhet për pozitën e presidentit, pozita e Kuvendit sipas Kushtetutës i takon partisë fituese” u shpreh Hekuran Murati.
Ndryshe, në seancën e së dielës, munguan plot 14 deputetë.
