Pagat e sektorit publik nuk u ekzekutuan në fund të muajit, ashtu siç përcaktohet me ligj. Kjo pasi që ushtruesit të detyrës së drejtorit të Thesarit të Shtetit, me nënshkrim të së cilit realizohen pagat, i ka skaduar mandati. Punëtorët e këtij sektori shprehen të shqetësuar me këtë vonesë.
Puna e çdo ditshme e tyre është tereni.
Në borë, diell e shi, zjarrfikësit janë reaguesit në situata emergjente.
Por, pagën për punën e muajit shtator, nuk e morën si zakonisht, në ditën e fundit të muajit.
“Normal që krijon vështirësi sepse gjinden edhe në obligime kreditore, dhe zakonisht bankat me të parin i tërhjekin detyrimet që i kanë punëtorët. Kjo pak na ka fut në vështirësi, por ishalla po shpresojmë se sot rregullohet”, tha zjarrfikësi Abdusamed Shkodra.
Jo vetëm kategorisë së zjarrfikësve, por të gjithë punëtorëve të sektorit publik, nuk iu ekzekutua në kohë paga e muajit shtator.
E krejtë kjo ndodhi vetëm pse dikujt I ka skaduar mandati i ushtruesit të detyrës së drejtorit të Thesarit të Shtetit dhe institucionet nuk arritën të emëronin një të ri.
Skandal i radhës nga Qeveria po konsiderohet kjo neglizhencë.
“Ligji është shumë i qartë se në momentin e skadimit të mandatit të ushtruesit të detyrës, nuk mund të nënshkruaj dhe rrjedhimisht i bie që pagat nuk kanë mundur të procedohen ashtu siç është dashur të procedohen. Kjo tregon edhe një herë se kësaj Qeverie i pëlqejnë avanturat, i pëlqejnë skandalet e njëpasnjëshme, dhe këtë mund ta klasifikojmë si skandalin e radhës”, tha Ali Gashi nga Sindikata e Administratës Publike.
E pasditen e së martës, u ekzekutuan pagat e sektorit publik.
Kjo u konfirmua nga punonjësit e sektorit publik.
