Koordinatorja e komiteteve në partinë e Lëvizjes Vetëvendosje, Dejona Mihali është thirrë për intervistim të premten në ora 09:30 të mëngjesit. Intervistimi i saj zgjati 4 orë për cka Prokuroria Speciale e Kosovës nuk ka dhënë detaje por vetëm ka konfirmuar intervistimin e Mihalit. Koordinatorja e LVV-së pas përfundimit të intervistimit ka thënë shkurtimisht se ishte aty për të “zbardhur të vërtetën” ndonëse e ka mohuar se ky intervistim lidhet me ngjarjet e fundit në KEK.
Herët në mëngjes iu përgjigj ftesës.
Dejona Mihali, koordinatore e komiteteve në LVV, të premten u paraqit në Prokurorinë Speciale të Kosovës.
Pas intervistimit katër orësh në Prokurori, ajo nuk ka dashur të jap detaje por shtoi se ishte aty për “zbardhjen e të vërtetës”.
Se cila është ajo e vërtetë, Mihali ka rekomanduar të pyetet prokuroria.
Ajo ka mohuar se ishte në intervistim për rastin e ish-kryeshefit të Korporatës Energjetike të Kosovës (KEK), Nagip Krasniqi, për të cilin është ngritur aktakuzë për keqpërdorim të detyrës zyrtare.
“Nga prokurori u intervistova për ta zbardhur të vërtetën”, tha Mihali pas intervistimit.
Prokuroria Speciale me herët njoftoi se sot Dejona Mihali, është paraqitur në Prokurorinë Speciale me ftesë të tyre.
Sipas njoftimit, e njëjta ishte duke u intervistuar në cilësinë e dëshmitares për disa çështje penale, të cilat kjo prokurori i ka në hetim.
E pas përfundimit të intervistimit erdhën edhe reagimet nga partitë opozitare.
I pari ishte Ramush Haradinaj i cili në rrjetin social Facebook, ka shkruar se intervistimi i saj lidhet me dyshimet e fundit në Korporatën Energjetike të Kosovës.
“Po i ngushtohet rrethi Mafisë Energjetike. Veprimet e fundit të drejtësisë në Kosovë po i japin shpresë popullit për fuqinë e ligjit mbi të gjithë. Mafia Energjetike duhet të përballet me ligjin. Shteti ligjor dhe demokracia nuk dorëzohen para strukturave të dyshimta kriminale. Po i ngushtohet rrethi”, tha Haradinaj.
Reagim pati edhe nga deputeti i Lidhjes Demokratike të Kosovës, Arben Gashi i cili ka shkruajt “krimi ka emër”.
Televizioni ka dërguar pyetje edhe në partinë e Lëvizjes Vetëvendosje por të njëjtit nuk kanë kthyer përgjigje.
