Situatën e sigurisë në Kosovë e sheh në tehun e thikës, zëvendës këshilltari për Sigurinë Kombëtare të Shtëpisë së Bardhë, Jon Finer.
Këto komente ai i bëri gjatë përmbledhjes së politikës së jashtme amerikane gjatë katër viteve të fundit nën udhëheqjen e presidentit, Joe Biden.
Ai tha se ekzistojnë dy vija kryesore ndarëse për të cilat janë të shqetësuar, derisa shtoi se qëndrimi amerikan është që Kosova duhet të jetë sovrane dhe të respektojë komunitetet pakicë.
Por çka nënkuptojnë këto deklarata të njërit prej njerëzëve kryesor të administratës Biden?
Ish-ushtaraku, Ismet Ibishi vlerëson se të gjitha deklarimet e Shteteve të Bashkuara të Amerikës sa i përket sigurisë, duhet të merren seriozisht.
“Masa shumë serioze janë marrë duke përfshi së pari KFOR-in si organ përgjegjës për sigurinë territoriale për tërë Kosovën e në veçanti në veri ka ngritë shumë një numër të lartë të kapaciteteve ushtarake qofshin ato në makineri ushtarake, qofshin ato njerëzore unë mendoj se janë forca të mjaftueshme për të garantuar siguri të plotë në atë pjesë të veriut”, tha Ibishi.
Kurse nënkoloneli në pension i Policisë, thotë se paralajmërimet e kryeministrit Kurti për sulme të mundshme në veri, janë në një linjë me deklarimet e SHBA-së.
“Deklaratat e kryeministrit me siguri e kanë një lidhje të përbashkët me State Departamentin amerikan por mendoj se nuk do të kemi ndonjë luftë frontale por mund të ketë grupe të organizuara terroriste që qëllim të vetëm e kanë që pjesa veriore edhe Kosova por edhe Ballkani në tërësi të jetë një zonë e luftës, destabilizimit p[ër arsye se kjo është në interes të Serbisë, Rusisë, Kinës dhe vendeve të bllokut të këtyre shteteve”, tha nënkoloneli në pension, Refki Morina.
Finer shtoi se shqetësim tjetër për SHBA-të në këtë rajon është ndarja e mundshme e Bosnjës, ku sipas tij, udhëheqësi i saj Millorad Dodik në formë retorike po ndjekë agjendë për shpërbërjen e shtetit.
