Hisen Berisha nga Partia Demokratike e Kosovës (PDK) ka vlerësuar se afrimi aktual i presidentes së vendit, Vjosa Osmani, dhe kryeministrit në detyrë, Albin Kurti, po ndodh për shkak të ambicieve të Osmanit për një mandat tjetër.
Sipas tij, Osmani dhe Kurti janë dy persona të gatshëm të negociojnë mbi çdo normë kushtetuese dhe ta shkelin Kushtetutën vetëm për të realizuar synimet e tyre politike.
“A e keni vërejtur përafrimin e fundit midis presidentes Osmani dhe kryeministrit në detyrë, Albin Kurti? Pse po ndodh kjo? Sepse presidentja ka ambicie për të qenë dhe për të marrë një mandat të dytë si presidente. Hapi i parë i kompromentimit të pozitës së saj si faktor unifikues brenda spektrit politik ishte takimi me të ngarkuarin për punë në Ambasadën Amerikane, ku ajo negocionte një koalicion të mundshëm mes LDK-së dhe VV-së në emër të mbështetjes për një mandat tjetër. Pra, pozita e saj është e kompromentuar. Përafrimi me Kurtin ka pikërisht këtë qëllim, sepse kemi të bëjmë me persona që janë në gjendje të negociojnë mbi çdo normë kushtetuese dhe ta shkelin Kushtetutën vetëm për të realizuar synimet e tyre politike,” ka deklaruar Berisha në emisionin “Mesditë” në Tëvë1.
Ai më tej ka akuzuar Kurtin dhe Osmanin se kanë sulmuar qëllimshëm gjyqtarin e Gjykatës Kushtetuese, Radomir Laban, për ta bërë këtë gjykatë jo funksionale.
“Ju e patë sulmin ndaj anëtarit të Gjykatës Kushtetuese. Nuk ishte çështje sigurie kombëtare, siç pretendonte presidentja, sepse për t’u bërë anëtar i Gjykatës Kushtetuese, ai kalon disa filtra. Sulmi ndaj këtij gjyqtari ishte thjesht për ta hendikepuar dhe për ta bërë jo funksionale Gjykatën Kushtetuese,” ka përfunduar Berisha./teve1.info/
