Deputetët opozitarë kanë dorëzuar kallëzim penal ndaj ministres së Arsimit, Arbërie Nagavci. Kallëzimi u dorëzua të martën në Prokurorinë Speciale nga anëtarët e Komisionit Hetimor për Tekstet Shkollore, me arsyetimin se subvencionimi i teksteve shkollore nga MASHTI ka shkelje ligjore.
Opozitarët të martën u bënë bashkë para dyerve të Prokurorisë Speciale.
E me vete kanë edhe një kallëzim penal.
Këtë të fundit në mesditë e dorëzuan ndaj ministres së Arsimit, Arbërie Nagavci.
Kjo meqë sipas tyre, ka shkelje ligjore në subvencionimin e teksteve shkollore nga kjo ministri.
Këtë e bëri të ditur kryetari i Komisionit Hetimor për Tekstet Shkollore, Shemsedin Dreshaj.
E deputeti nga PDK, Ardian Kastrati, tha se ekzekutivi nuk arriti ta arsyetonte diferencën prej 6 milion eurove.
“Komisioni hetimor për funksionimin e teksteve shkollore për vitin 2023/24, ka punuar me mandat nga Kuvendi i Republikës së Kosovës, ka përmbyllur një proces të intervistimit në prani të ekspertëve të emëruar nga ana e mazhorancës dhe nga ana e opozitës dhe ky proces është përmbyllur me një raport final, i cili ka mjaft të gjetura të shkeljes procedurale, të shkeljeve ligjore dhe ka bazë për hetim të mëtejmë prokurorial lidhur me përgjegjësinë e individëve që janë marrë me këtë proces”, tha Dreshaj.
E deputeti nga PDK, Ardian Kastrati, tha se ekzekutivi nuk arriti ta arsyetonte diferencën prej 6 milion eurove.
“E para është që në komisionin hetimor ata nuk kanë arritur të arsyetojnë se ku kanë mbetur 6 milionë euro diference. Nga 4 milionë të planifikuara ata i kanë harxhuar 11 milionë në vitin e kaluar. Përveç kësaj nxënësit nga klasa 6-9 nuk i kanë marrë fare librat. Nagavci si udhëheqëse e këtij procesi, Murati si përgjegjës që i kanë shpenzimet financiare dhe Kurti si shef i këtyre të parëve duhet të rrëfehen te Prokuroria Speciale”, tha Kastrati.
Anëtarët e tjerë të këtij komisioni hetimor, thanë se partia në pushtet nuk ua dorëzoi listën e përfituesve.
“Vetëvendosja ka filluar të bojkotojë punën e komisionit hetimor parlamentar momentin qe janë evidentuar shkelje ligjore në përdorim të buxhetit. Një prej raporteve kryesore te cilin ne e jemi kërkuar ja qenë lista e përfituesve nga subvencionimi me tekste shkollore dhe Ministria e Arsimit dhe Ministria e Financave asnjëherë nuk ka dorëzuar raport të tillë”, tha deputeti nga PDK-ja, Bekim Haxhiu.
“Kjo është vërtetuar edhe me procesin e intervistimit të dëshmitarëve që janë paraqitur para komisionit. Është fat i mirë që një grup i ekspertëve e ka hartuar një raport me të gjetura reale dhe këtë raport ne sot e dorëzojmë në Prokurorinë Speciale”, tha deputeti nga LDK-ja, Agim Veliu.
Sivjet ka qenë hera e dytë që Ministria e Arsimit ka subvencionuar blerjen e teksteve shkollore, përmes platformës “eKosova”.
