“Kjo nuk është lamtumirë, kjo është vetëm mirupafshim”
Duke cituar ish-Presidentin Hashim Thaçi, Memli Krasniqi u largua nga drejtimi i Partisë Demokratike të Kosovës.
Krasniqi tha se po dorëhiqhet pas një kohe të gjatë reflektimi.
“Ky vendim nuk është i momentit e as i zhvillimeve të fundit. Është reflektim mbi atë se çka i duhet PDK-së në fazën e ardhshme. Nuk është vendim prej lodhjes apo zhgënjimit – por prej dashurisë për partinë time. E bëj këtë me paqe në shpirt dhe me dashuri në zemër. Dashuri për PDK-në. Dashuri për Kosovën”, tha Krasniqi.
Ai ka bërë të ditur po ashtu se e ka thirrur Konventën e PDK-së për të zgjedhur kryetarin e ri të partisë më 17 nëntor.
Tëvë1 mëson brenda PDK-së, se Bedri Hamza planifikohet të marrë pozitën e kryetarit të partisë.
Mbështetje këtij emri i dha edhe vet Krasniqi.
“E di se ajo ditë do të jetë dëshmi e pjekurisë sonë politike, e demokracisë sonë të brendshme dhe e forcës sonë për të ecur përpara, nëse Bedri Hamza kandidon unë e mbështes plotësisht”, u shpreh ai.
Memli Krasniqi ishte zgjedhur kryetar i Partisë Demokratike të Kosovës më 3 korrik 2021.
