E hëna nuk i bëri bashkë katër ish-bashkëpartiakët.
Të ndodhur në një aktakuzë të përbashkët, Xhelal Sveçla, Fitore Pacolli Dalipi, Drita Millaku e Salih Zyba, nuk u paraqitën të gjithë në gjykatore.
Të pranishëm në sallë, ishin vetëm Millaku e Zyba, çka nuk mjaftoi për mbajtjën e seancës.
Arsyet e mungesës së ministrit të Punëve të Brendshme, Xhelal Sveçla i tregoi gjykatësi, kurse për deputeten, Fitore Pacolli – Dalipin, u tha se Gjykata nuk është e njoftuar për arsyet e mungesës.
Rrjedhimisht, seanca u shty.
Katërshja, në seancën paraprake ishin deklaruar të pafajshëm për akuzat për hedhje të gazit lotsjellës.
Sipas aktakuzës, më 21 mars të vitit 2018, këta brenda sallës së Kuvendit, kishin hedhur bombola të gazit lotsjellës, ku për pasojë deputetët ishin detyruar të lirojnë sallën, duke pamundësuar kështu vazhdimin e seancës së Kuvendit.
Si pasojë e kësaj, duke iu refereuar asaj se çfarë shkruan në aktakuzë, të gjithë deputetët ishin detyruar ta lironin sallën e Kuvendit, me ç’rast kanë pamundësuar vazhdimin e seancës.
Në bazë të kësaj, secili veç e veç akuzohen se kanë kryer veprën penale “Përdorimi i armës apo mjetit të rrezikshëm” nga neni 375, paragrafi 1 të Kodit Penal, kryerësi i së cilës dënohet me burgim prej një deri në tetë vjet.
