Të parët u paraqitën avokatët mbrojtës.
Pas kohës së planifikuar për seancë, erdhën edhe palët tjera në Gjykatën Themelore në Prishtinë.
Të prangosur u sollën treshja, Blagoje Spasojeviq, Vladimir Toliq dhe Dushan Maksimoviq.
Mirëpo, mungoi personi kryesor i kësaj seance.
“Konstatoj mosprezencën e dëshmitarit anonim A2, i cili ka qenë i planifikuar të dëgjohet në cilësinë e dëshmitarit për ditën e sotme. E kam të konfirmuar nga stafi i Gjykatës dhe dhoma teknike, ku ka qenë dashur që të paraqitet ky dëshmitar sot”, tha Arben Hoti – kryegjykatës.
Mirëpo, për këtë dëshmitar Prokuroria Speciale nuk u zmbraps për ta pasur në procesin ndaj të akuzuarve për sulmin terrorist në Banjskë.
“Autoritetet kompetente duhet të arrijnë ta kontaktojnë atë, që të jetë i mundur edhe dëshmia e tij në këtë gjykim. Për çka i propozoj Gjykatës që të vazhdojë më dëshmitarët e tjerë sipas listës së propozuar”, u shpreh prokurori Naim Abazi.
E gjithë seanca e së premtes ishte rezervuar për këtë dëshmitar anonim.
Rrjedhimisht, mungesa e tij solli ndërprerjen e seancës.
“Meqenëse kemi planifikuar tërë ditën me këtë dëshmitar anonim A2, konstatoj se në mungesë të këtij dëshmitari nuk mund të vazhdojmë me shqyrtimin gjyqësor. Andaj Gjykata merr aktvendim, seanca ndërpritet dhe do të vazhdojmë me seancën e paraparë ditën e hënë, me dëshmitarin tjetër të radhës anonim”, u shpreh kryegjykatësi, Arben Hoti.
Gjyqi për të akuzuarit ndaj sulmit të 24 shtatorit 2023 në Banjskë të Zveçanit, do të vazhdojë për tre ditë javën e ardhshme.
