Në kohën kur i gjithë fokusi ishte tek ta, doli jashtë funksioni.
Kësisoj rezultatet e 12 orëve votim për zgjedhje parlamentare, u bë e pamundur të transmetohen në kohë reale dhe të sakta, në ueb faqen e Komisionit Qendror të Zgjedhjeve.
Por joqasshmëria nuk ishte problemi i vetëm me të cilin u ballafaqua KQZ-ja në platformën online.
Aty filluan të transmetoheshin edhe të dhëna në shpërputhje mes vete, ku numri i votave që një parti supozohej t’i kishte marrë në një komunë, tejkalonte numrin e votave të përgjithshme në po atë komunë.
Kjo vlerësohet se ndodhi shkak i mungesës së aprovimit të shkallshmërisë së futjes së të dhënave.
“Sipas të gjitha gjasave ka ndodhë ashtu që personi i njëjtë i fut të dhënat, i konfirmon dhe dalin në publik, edhe shkakton kaos edhe informacion të gabuar, ose informacion jo të saktë. Për këtë arsye, mendoj se sistemi ka dështuar edhe në përballimin e fluksit të vizitorëve, por edhe në saktësinë e informacionit. Ky sistem mendoj se ka humbur kredibilitetin dhe besueshmërinë”, ka deklaruar Kastriot Fetahaj -IT.
Problemet e konfirmuara nga KQZ-ja, bën që ky institucion të dalë me njoftim se të dhënat do të përpunohen në mënyrë manuale.
“Stafi i KQZ-së dhe ne, vet anëtarët e KQZ-së, do të qëndrojmë gjithë natën sonte në objekt dhe do të punohet që të gjitha të dhënat nga formularët e vendvotimeve, të futën në mënyrë manuale në kompjuter”, ka deklaruar kryetari i KQZ-së, Kreshnik Radoniqi.
E gjithë kjo situatë, cilësohet si dështim i KQZ-së.
“KQZ-ja ka dështuar në pranimin e sistemit, nuk ka pasur kritere të larta të sigurisë, performancës dhe funksionalitetit, për me pranu sistemin. Thjesht ka pranuar një sistem, që nuk po e din se çka është, nuk ka bërë testime të mjaftueshme për me i pa gabimet e mundshme që mundet me i prodhur sistemi”, tha Fetahaj.
Për këto telashe dhe mundësinë e tentimit për manipulim të dhënash nga vendvotimet, pati raportime se Prokuroria Speciale ka filluar me hetime, por që një gjë e tillë nga Prokuroria e Shtetit, u mohua.
Bazuar në këto zhvillime, presidenca përmes një postimi në facebook, kërkoi që të ruhet integriteti i procesit zgjedhor, duke u siguruar që çdo votë të numërohet saktë.
