Përmes një aksioni, Partia Socialdemokrate sot shfaqi pakënaqësitë që ka ndaj veprimeve të Qeverisë në veri. I pari i kësaj partie, Dardan Molliqaj tha se këto veprime qojnë në një autonomi për serbët në këtë zonë.
Të gjitha masat e sigurisë po ndërmerren.
E Njësia Speciale u vë në pozicion për të pasur gjithçka nën kontroll.
Ky numër i shtuar i policëve mbi lumin e Ibrit në Mitrovicë u bë të enjten për shkak të një aksioni të Partisë Socialdemokrate.
E në pjesën e veriut qëndronin si rëndomë karabinierët e KFOR-it.
Kordoni i policisë u vendos në mes të urës, aty edhe tabela nga PSD-ja me mbishkrimin “rrugëtimi i Kurtit”.
Kryetari i partisë, Dardan Molliqaj tha se partia në pushtet më herët i kanë quajtur “bashkëpunëtor të Vuçiqit” kushdo që ka tentuar ta hap urën e Ibrit me koordinim.
“Kushdo që në Kosovë ka thënë se ura duhet të hapet në koordinim, këta (LVV) e kanë cilësuar bashkëpunëtor të Vuçiqit. Sipas kritereve të tyre, kryeministri Kurti dhe ministri Sveçla janë bashkëpunëtorë të Vuçiqit, por jo sipas kritereve tona. Ne besojmë se ky është diskutim i kotë. Ura mund dhe nuk mund të hapet, vendimin për këtë e kemi të qartë – atë e ka KFOR-i dhe QUINT-i përmes rezolutës 1244. Prandaj, këto janë çështje të parëndësishme, rruga ku po na çon është e rëndësishme”, u shpreh Molliqaj.
I pyetur nga Tëvë1 pse këtë aksion nuk e realizuan në pjesën veriore, Molliqaj tha se është kundër të tilla veprimeve.
“Nëse m’ke lexu edhe m’ke dëgju, unë jam kundër aksioneve dhe veprimeve në veri të Kosovës, mendoj që ato të dërgojnë në autonomi ose në izolim. Unë mendoj që është gabim ajo punë”, tha ai.
E kundër këtij aktiviteti doli një qytetar.
“Me i pa qit qytetarët në shtëpitë e veta më herët, nuk kish ndodh barrikada këtu në urë të Ibrit, po nuk i kanë qit, tash vjen çifti i Dardan Molliqit e shet mend këtu që tybe ka ardhë për një t’mirë ky ka ardhë vetëm me bë keq”, u shpreh ai.
Në kohën që po bëhej ky aksion, mbi urën e lumit Ibër kaloi kryetari i komunës së veriut të Mitrovicës, Erden Atiq.
Tabelën e vendosur nga PSD-ja, më pas e largoi Policia e Kosovës.
