Për rreth dy dekada dha kontribut në fushën e arsimit dhe të sigurisë.
Profesori universitar, Gëzim Qerimi ka vendosur t’i hyjë garës për deputet në zgjedhjet e 28 dhjetorit në listën e Partisë Demokratike të Kosovës.
Ai tregon për arsyet që e kanë shtyrë të marrë vendim për angazhim në jetën politike.
“Si çdo qytetar i Republikës së Kosovës, viteve të fundit kam qenë i pakënaqur me zhvillimet politike në Kosovës, veçmas me vitin e fundit. Gjithë ne jemi dëshmitarë që ka pasur degradim në të gjitha fushat e jetës dhe vendosa të mos jem prej atyre zërave që vetëm i kritikoj proceset, por të bëhem pjesë e proceseve, të bëhem pjesë e politikës dhe të jap kontributin tim në dobi të të gjithë qytetarëve të Kosovës”, thotë ai.
Qerimi thotë se është koha që Kosova të bëjë hapin që garanton sigurinë afatgjate të vendit.
“Do të angazhohem që hapi i tretë më i rëndësishëm për Kosovën në 25 vitet e fundit, pra pas lirisë dhe Pavarësisë së Kosovës të jetë anëtarësimi i Kosovës në NATO. Sepse siguria është bazë e zhvillimit ekonomik dhe shoqëror… Vlerësoj se qytetarët duhet të votojnë individët të cilët janë kompetent në fushën e tyre dhe që kanë vlera edhe kombëtare edhe profesionale”.
Edhe partitë tjera politike në këtë garë kanë futur në listat e tyre profesionistë të fushave tjera.
Në Lidhjen Demokratike të Kosovës hyri gjenerali Gëzim Hazrolli me një përvojë në fushën e mbrojtjes, përkatësisht Forcën e Sigurisë së Kosovës.
Ndërkaq, edhe në Lëvizjen Vetëvendosje pati risi ku në këtë garë është edhe Naim Bardiqi i cili deri para pak muajsh mbante pozitën e Sekretarit në Ministrinë e Shëndetësisë.
