Në hyrje të rrugës, u pa autobusi me targa të Beogradit.
Këta serbë, erdhën nga vende të ndryshme për të festuar festën e Vidovdanit.
Por para hyrjes në Gazimestan, serbët po kontrollohen në detaje nga Policia e Kosovës për ndonjë simbol provokues.
Për disa prej tyre, nuk u lejua hyrja në këtë ceremoni.
I gjithë vendi u rrethua nga Njësitë Speciale të Policisë së Kosovës.
Forca të shumta ishin në hyrje dhe brenda kullës.
Të tjerë pati edhe nga Inspektorati Policor.
Situata ndryshoi kur serbët hynë brenda.
Para kishës edhe në këtë vit, filluan këngët nacionaliste.
Por të gjithë ata që kënduan Kosova është Serbi dhe Kosova është zemra e Serbisë u monitoruan me dron.
Pati të tjerë që ngritën edhe tre gishta.
Zyrtarë të Njësisë Speciale po i prisnin te dera.
Të gjithë ata që u identifikuan, një nga një u shoqëruan për në stacionet policore.
Për ndalimet, detaje dhanë edhe nga Policia e Kosovës.
“Nuk është raportuar ndonjë rast i cili ka ndikuar në mbarëvajtjen e manifestimeve, përveç shoqërimit të 17 personave në stacion policor për intervistim, të cilët kanë provokuar masën, duke kryer nxitje të urrejtjes dhe posedonin veshje me përmbajtje provokuese e nxitëse, në kundërshtim me dispozitat ligjore. Të gjitha veprimet policore janë realizuar në bashkëpunim dhe koordinim me organet e drejtësisë, me vendim të të cilëve një të dyshuari i është shqiptuar masa e ndalimit mbi dyshimin e bazuar për veprën penale armëmbajtje pa leje, një tjetri i është shqiptuar fletëparaqitje për kundërvajtje, 4 të tjerë janë liruar, kurse 11 të tjerë janë në procedurë të intervistimit”, thuhet nga Policia e Kosovës.
Kjo ceremoni mbahet çdo vit në Gazimestan, për të përkujtuar princin mesjetar serb Car Lazarin dhe ushtarët e tij të rënë në humbjen e Betejës së Kosovës më 1389 kundër Perandorisë Osmane.
