Më shumë se një vit protestash kundër vendimit të Marokut për të normalizuar lidhjet me Izraelin i ka inkurajuar aktivistët dhe ka zgjeruar hendekun midis vendimeve të qeverisë dhe ndjenjave të të qeverisurve. Zemërimi është përhapur në portet strategjike të vendit.
Aktivistët po u bëjnë thirrje zyrtarëve të portit maroken që të përpiqen të bllokojnë anijet që transportojnë ngarkesa ushtarake në Izrael, ashtu siç bëri Spanja vitin e kaluar.
Protestat shpesh synojnë kompaninë daneze të transportit detar Maersk, e cila ndihmon në transportimin e komponentëve të përdorur për të prodhuar F-35 të Lockheed Martin si pjesë e Programit të Pjesëmarrësve Bashkëpunues të Sigurisë të Departamentit të Mbrojtjes të SHBA-së që lehtëson shitjen e armëve te aleatët, përfshirë Izraelin.
Një fushatë e ngjashme bojkoti e çoi Lghazaoui-n në burg vitin e kaluar, por kjo nuk e pengoi atë të dilte përsëri në protesta muajin e kaluar, pas lirimit të tij.
Lghazaoui është një nga më shumë se një duzinë aktivistësh të ndjekur nga autoritetet marokene për kritikimin e lidhjeve të qeverisë me Izraelin.
Gjatë një tubimi në nëntor në Kazablanka ku foli Lghazaoui, oficerë të veshur civilë e rrahën atë dhe të tjerë për t’i penguar të përparonin drejt Konsullatës Amerikane, tha ai.
Më vonë ai postoi për Maersk në mediat sociale dhe u arrestua dhe u akuzua për nxitje të terrorizmit. Ai kaloi katër muaj në burg, nga nëntori deri në shkurt.
“Ata përpiqen t’i heshtin njerëzit”, tha Lghazaoui për Associated Press. “Ata po më përdornin për t’i bindur njerëzit ose për t’i larguar nga ajo që po bënin”
Maroku është një nga katër shtetet arabe që normalizoi marrëdhëniet me Izraelin si pjesë e Marrëveshjeve të Abrahamit të ndërmjetësuara në vitin 2020 gjatë mandatit të parë të Presidentit Donald Trump.
“Rrallë kam parë një hendek të tillë midis opinionit publik dhe monarkisë. Ajo që po bëjnë elitat e pushtetit shkon plotësisht kundër asaj që dëshiron populli maroken”, tha Aboubakr Jamai, dekan i Qendrës së Madridit në Kolegjin Amerikan të Mesdheut.
