Punëtorët shëndetësore protestuan sot para Qeverisë, duke kërkuar nënshkrimin e kontratës kolektive
Me pankarta në duar, dolën para objektit të Qeverisë.
Në këtë mënyrë, punëtorët shëndetësorë shfaqën pakënaqësitë që kanë me kontratën kolektive.
“Kërkesat janë të njëjta si në protestën e kaluar, mos nënshkrimi i kontratës kolektive, e cila na ka hendikepuar në terren sepse na kanë hequr shumë benefite dhe është një obligim ligjor. Nuk është në dëshirë as të Ministrisë as te Qeverisë për të bërë. Kishim një kontratë kolektive një anshëm e kanë shkëputur pa e marrë mendimin tonë”, ka thënë Tevdie Imeri, kryetare e Federatës Sindikale të Shëndetësisë së Kosovës.
Sipas saj, në shëndetësinë kosovare nuk janë të plotësuara as kushtet elementare.
“As shampon të duarve nuk kanë punëtorët shëndetësorë dhe as letra për ti tharë duart, e mos të flasim për më tepër. Nuk shkon as aty nëpër klinika ku pikë uji cdo ditë, nuk shkon as aty ku punëtorët shëndetësor nuk e kanë as një zhveshtore ku të ndërrohen të heqin uniformen ose te veshin uniformën. E nuk kanë as kushtet elementare”, tha ajo.
E nga ana tjetër nënkryetari i kësaj federate, Bajram Kryeziu bëri të ditur se kanë pasur premtime që do të realizohet kontrata kolektive sektoriale, por që sipas tij, as kjo nuk u bë.
“Në moment të fundit erdh vendimi që nuk bëjmë kontratë kolektive sektoriale, kemi me bë kontratën kolektive të përgjithshme që është e parealizueshme. Kontrata kolektive e përgjithshme parashihet për 300 mijë punëtorë. Nuk kanë qenë të gatshëm me bë për 10 mijë e do ti bëjnë për 300 mijë, ku janë edhe punëtorët e sektorit privat”, tha Bajram Kryeziu, nënkryetar i FSSHK-së
E protesta nuk mbaroi me kaq.
Kjo pasi që Ministria e Shëndetësisë thirri në takim protestuesit.
Por as kësaj radhe nuk arritën një marrëveshje.
“Kësaj radhe nuk ishte i qartë ministri dhe jo unë, ai kërkesat tona i kishte kuptuar shumë mirë, tha i kam shumë të qarta mirëpo po kërkon të takohemi dhe njëherë”, tha Tevdie Imeri.
Takimi i radhës sipas Federatës Sindikale të Shëndetësisë pritet të mbahet të premten.
Tëvë1 ka kontaktuar edhe Ministrinë e Shëndetësisë, por të njëjtit nuk kanë kthyer përgjigje.
Kronika e realizuar nga Fëllënza Krasniqi
