Me t’u bërë ora 8 e mëngjesit bujqit e Vushtrrisë u mblodhën para njësisë së ndërmarrjes së ujësjellësit “Ibër Lepenci”.
Kultivuesit e patates tash e disa muaj thonë se janë duke u përballur me problemin e ujit për ujitjen e kësaj kulture bujqësore.
Fahri Xhaferi, nga fshati Dobërllukë, thotë se për shkak të mungesës së ujit, patatet e mbjella do i dështojnë.
“Kemi ble plehra të shtrenjta, fara të shtrenjta, sot ka ardhë koha më ujit tokën, me ujit pataten, nuk ka ujë, veç jemi ardh më u marrë vesh me drejtorin a kush do le të vjen me neve, pse s’ka ujë. Para 30 vjetëve kemi ujit me traktor, edhe tani ka ardhë koha me ujit më traktor”, tha bujku.
Për disa orë ata pritën në takim drejtorin e kësaj ndërmarrje.
E për të takuar këta bujq, në këtë vend erdhi edhe kryetari i Komunës, Ferit Idrizi.
“Unë nuk e di ku është problemi, por erdha se dëgjova se është një pakënaqësi këtu dhe erdha me vizitu se me të vërtet tani është koha kyçe për ujitje”, tha kryetari.
Ai i vetëm hyri në takim me përfaqësuesit e kësaj ndërmarrje.
E pas përfundimit të këtij takimi, për të diskutuar u ftuan edhe protestuesit.
Por të njëjtit nuk pranuan që diskutimet të bëhen brenda pa prezencë të mediave, kështu që debati ndërmjet tyre vazhdoi.
E fjalën e mori edhe një herë kryetari i Komunës ku pati një kërkesë ndaj këtyre bujqve.
“Po del që një numër nuk kanë kontrata, ata që nuk kanë le të vijnë të bëjnë kontrata. Drejtori tha le të vijnë le të nënshkruajnë kontratat”, tha kryetari.
Kurse nga ndërmarrja “Ibër Lepenci” premtuan që uji nuk do të ndalet.
“Nëse kemi mungesë në zhvillimin e kulturave për shkak të ujitjes, hajde dalim edhe bëjmë edhe ekspertiza, s’kemi qare pa e nal najherë, po na nalet uji i pijes, nuk garantojmë që uji pas ndonjë defekti, ka me pasë ndalesa”, tha drejtori i Departamentit “Ujitja”, Deme Abazaj.
Por pas këtyre fjalëve, protestuesit u tensionuan më shumë.
“Qaj është rrenci me i madh. Edhe vitin e kalum qashtu na ka tradhtuar edhe kurgjo nuk ka bo, kqyre çka foli, apet kemi me pas mungesë shkaku i atij”, tha bujku – Fehmi Xhaferi.
Protestuesit paralajmëruan protestë më të madhe në rast që nuk iu bëhet një zgjidhje.
