Viti 2025 ishte një vit i humbur për Serbinë në rrafshin politik.
Protestat e fuqishme në Serbi nga studentët nuk janë ndalur dhe i kanë shkaktuar telashe të mëdha regjimi të presidentit serb, Aleksandar Vuçiq.
Këto protesta më masivet që nga rënia e Millosheviqit u nxitën pas vdekjes së 16 personave në një aksident në Novi Sad.
Kërkesa kryesore e studenteve është që ketë zgjedhje të parakohshme.
Kësaj kërkese partia në pushtet deri më tani i ka rezistuar, por nuk e ka përjashtuar mundësinë që ajo të realizohet gjatë vitit të ardhshëm.
Gazetari investigativ serb, Branko Cecen, në një intervistë që e ka dhënë për Tëvë1, ka treguar detaje se si ndodhi tragjedia në Novi Sad.
“Pjesa e ndërtimit të stacionit hekurudhor në Novi Sad e cila është rindërtuar dy herë gjatë viteve të fundit, ka rënë papritmas dhe ka vrarë 14 persona. Kjo ndodh kur largoheni nga sundimi i ligjit dhe lejoni që korrupsioni të zë vend, dhe sigurisht kur afroheni shumë me Kinën. Kina është investitori kryesor në Serbi por problemi kryesor është se marrëveshjet që po bëhen mes dyja vendeve nuk janë transparente. Një kompani kineze ishte kontraktuar për të ndërtuar atë pjesë të stacionit hekurudhor së bashku disa kontraktor lokal”, deklaroi Cecen.
Historiani dhe koordinator i Frontit të Majtë të Gjelbër, Branislav Dimitrjeviq, shprehet i bindur studentet kanë fuqi për të bërë ndryshime të mëdha politike në Serbi.
“Për herë të parë Vuçiq po ndjen që pozita e tij po dobësohet. Njerëzit që i ai i ka afër po frikësohen se çfarë mund të ndodh në të ardhmen me ta sepse kanë shkelur shumë ligje. Por në aspektin e statistikave Vuçiq ka akoma mbështetje të madhe, madje më të madhe se Millosheviqi. Por siç ndodh rëndom me diktatorët edhe pse kanë mbështetje të madhe ata mund të thyhen shumë shpejt nëse qytetarët ua kthejnë shpinën. Çdo fillim e ka një fund dhe Vuçiq e di shumë mirë këtë gjë. Nuk po funksionojnë më akuzat e tij ndaj studentëve që kinse ata janë të paguar nga shërbimet e jashtme apo që ata janë agjendë të Kurtit. Nuk mund të vazhdoj ky diskurs i njëjtë që 30 vjet”, deklaroi ai.
Ndërsa, deputeti i vetëm shqiptar në Kuvendin e Serbisë, Shaip Kamberi, duke i komentuar protestat ne Serbi ka thënë se ka pakënaqësi mbarëpopullore.
“Tragjedia në Novi Sad është veçse maja e ajsbergut e një pakënaqësie mbarë popullore në Serbi ndaj pushtetit të Vuçiqit. Ka pakënaqësi për mënyrën se si është duke udhëhequr me vendin Aleksandar Vuçiq. Ai ka një periudhë të gjatë që më shume sillet si despot dhe me udhëheqjen e partisë së tij po zhduken gradualisht edhe ato pak institucione demokratike në Serbi”, tha Kamberi.
Përgjatë një viti në Serbi janë mbajtur mbi 10.000 tubime kundër presidentit autoritar serb, Aleksandar Vuçiq.
Në një rezolutë të Parlamentit Evropian, udhëheqja shtetërore e Serbisë konsiderohet përgjegjëse për përshkallëzimin e represionit, normalizimin e dhunës dhe dobësimin e institucioneve demokratike.
